Наскоро издавање градежни дозволи по електронски пат




Според министерот за транспорт и врски Миле Јанакиески, преземени се крупни чекори напред во реформирање на градежништвото, за што, како што вели, поддршка доаѓа од сите страни.

По драстичното олеснување и упростување на постапките потребни за добивање одобрение за градење, за што Македонија има најголем скок во годинешниот извештај „Doing Business“, Владата најавува воведување систем за издавање на тие одобренија по електронски пат. Тоа значи дека градежните дозволи ќе можат да се добиваат уште побрзо, а заради принципот на кој е обмислен системот, контролата врз овој процес ќе биде уште позасилена од претходно, информираат од Министерството за транспорт и врски.

Целта на системот е да овозможи следење на процесот за издавање одобренија за градба, како на државно, така и на ниво на секоја општина, преку управување со процесот, потребните чекори, документи, проследување до надлежните институции и сектори, со запазување на законските рокови и надлежности. Процесот, истакнуваат од Министерсгвото, го опфаќа целиот циклус од аплицирање до издавање одобрение за градба.

Според министерот за транспорт и врски Миле Јанакиески, преземени се крупни чекори напред во реформирање на градежништвото, за што, како што вели, поддршка доаѓа од сите страни.

- Освен што имаме поддршка од граѓаните во спроведените анкети, каде 80 проценти од нив го поддржуваат Законот за легализација на дивоградбите, евидентна е и поддршката на бизнис-секторот. Највпечатлив е скокот од 86 места нагоре во сегментот подобрување на постапката за добивање градежни дозволи на листата на топ-реформатори на Светска Банка. Во овој дел сме број еден реформатор од сите 183 земји од светот кои се анализираат во извештајот, изјави Јанакиески.

Од електронското издавање на градежните дозволи, укажуваат од ресорното Министерство, најголеми придобивки ќе бидат брзото и ефикасно поднесување на барањето без чекање редици, нервози и запазување на работни времиња, како и транспарентноста во целиот процес на негово одобрување, преку увид во секоја фаза и чекор од процесирањето. Дополнително на ова, посочуваат, ќе има и намалување на трошоците за поднесување бидејќи ќе се приложуваат дигитални верзии на документите, а нема да мора да се печатат, умножуваат,....

Реформата треба да овозможи забрзано делување и на администрацијата и дигитално поврзување на сите институции кои се вклучени во процесот, за да се зголеми ефикасноста во работењето и контролата.

По неодамнешниот старт на самостојното управување на осум општини со градежното земјиште, од Министерството за транспорт и врски очекуваат во следниот период нивниот број да се зголеми. Тоа го темелат на активностите на кои работеле сите општини за исполнување на условите од Законот за градежно земјиште, со што ќе можат да го преземат менаџирањето со градежното земјиште од централната власт.

- Овој процес претставува чекор плус во олеснувањето на постапките во делот на градежништвото, затоа што се овозможува комплетирање на целата постапка - купување и закуп на градежното земјиште и добивање на градежни дозволи, сe на едно место, истакнуваат од Министерството за транспорт и врски.