22.10.2011, 14:12 Почина саудискиот престолонаследник
Саудискиот престолонаследник принцот Султан бин Абдул-Азиз вчера почина на 86-годишна возраст, соопшти кралскиот дворец.
Престолонаследникот на најголемиот светски извозник на нафта, кој според официјалната биографија е роден во 1928 година, беше и министер за одбрана во последните 50 години.
Тој беше на лекување од рак на дебелото црево во САД и во јули му е извршена операција. Оттогаш не е добиена никаква информација за неговата здравствена состојба.
Принцот Султан е полубрат на кралот Абдула. По неговата смрт престолонаследник најверојатно ќе стане 78-годишниот принц Најеф бин Абдул-Азиз, кој е министер за внатрешни работи и, исто така, полубрат на кралот Абдула.
Првпат во историјата на кралството новиот саудиски престолонаследник ќе биде избран на семеен совет на династијата Ал Сауд.
Во 2006 година е формиран Совет за верност кон монархијата по реформа на правилата за наследување, со цел да се обезбеди мирно предавање на власта. Советот се состои од 35 принцови. Негов претседател е доајенот во династијата Ал Сауд, принцот Мешаал бин Абдул-Азиз, исто така полубрат на кралот.
|
