Тројца повредени на наплатната рампа Желино

ФОТО: Зоран Андонов

ТЕТОВО - Три лица од кои еден полицаец, се повредени, а причинета е и поголема материјална штета кога на наплатната рампа Желино дошло до судир на три автомобили. Според информации на СВР Тетово, се' се случувало како последица на снежните врнежи и веќе наталожениот снег на коловозот. Несекојдневната сообраќајка се случила во саботата околу 20,30 часот.

На рампата бил застанат „форд ескорд“ со тетовски регистрации. На него налетало „рено лагуна“, управувано од 53-годишниот Ш.С. од Гостивар, во кое бил и неговиот син. Набргу тука пристигнала и полициска екипа да изврши увид. Поради неприлагодената брзина на условите на патот, возило марка „шевролет“ со скопски таблички, управувано од Е.Т. (30), не успеало навреме да запре, удрило во возилото на гостиварецот.

Од ударот повредени се Ш.С., неговиот син и еден полицаец. Тројцата биле пренесени во тетовската болница, каде по ук��жаната помош, полицаецот е задржан на натамошно лекување, а таткото и синот пуштени дома. Во овој вистински „карамбол“, оштетена е и една кабина на наплатната рампа.

СВР Тетово информира дека во текот на претходното деноноќие, како последица на снежните врнежи и неприлагодени брзини со условите на патот, се случиле шест сообраќајни незгоди. (Г.Е.)