„Та Неа“: Отворена врата за Скопје, но под услови

Весникот пишува дека овој пресврт е резултат на интензивниот притисок што во последно време Брисел го прави врз Атина

Грција ќе каже „да“ за почеток на пристапни преговори на Македонија со ЕУ на самитот следната недела во Брисел, но под одредени услови, пишува грчкиот весник „Та Неа“.

Овој пресврт е под интензивниот притисок кој во последно време Брисел го прави врз Атина, пишува весникот. И досега имаше предупредувања, но притисокот стана јасен кога еврокомесарот за проширување Штефан Филе претстави предлог за „нова преговарачка рамка“ која ќе и овозможи на Македонија да ги почне преговорите со Унијата, а прашањето за името да се реши во меѓувреме.

Според „Та Неа“, предлогот на грчката страна во к��нечниот текст на резолуцијата, за која се` уште се преговара и се очекува да биде финализирана на вечерата на европските лидери наредната недела, е во формулацијата со која Советот ќе ја повика Комисијата да ја презентира преговарачка рамка за Македонија „временски“ и „во поглед на почеток на пристапните преговори на Македонија“. Тоа во суштина значи дека Атина бара од Европската комисија да ја претстави прво рамката за преговори во која грчката страна бара решавање на прашањето за името и добрососедски односи, за Грција да се согласи да му даде зелено светло на Скопје, објаснува весникот.

Според дипломатски извори, за предлогот и поставените услови интензивно се преговара и ситуацијата е едноставна – „земи или остави“. Ова значи дека ако не се постигне договор, Атина ќе прибегне кон својата вообичаена тактика и ќе ги блокира пристапните преговори.

Во секој случај, пишува „Та Неа“, дипломатски извори истакнуваат дека грчкиот предлог е важен чекор напред кој на Брисел му покажува дека грчката страна е подготвена да разговара. Ова е период во кој Атина не може да си дозволи да се судри со европските партнери и прашањето за името е нешто за што Германците, и не само тие, почнуваат да го губат трпението, нагласува грчкиот весник.

Портпаролот на грчкото МНР Григорис Делавекурас вчера ги демантираше медиумите во Атина дека Грција има намера да се сложи Македонија да ги почне пристапните преговори со ЕУ без претходно да се реши прашањето за името.

„Грчката позиција останува стабилна и конзистентна, дека за почеток на пристапните преговори, предуслов е исполнување на сите услови и критериуми утврдени со одлуките на ЕУ. Најважен од овие услови е почитување на соседите и следствено на тоа изнаоѓање на взаемно прифатливо решение за прашањето за името“, беше наведено во изјавата на Делавекурас. (МИА)