Грција демонстрира нервоза во Брисел

Грчкиот амбасадор и' порачал на Австрија дека завршило нејзиното време на Балканот

„Грчки мозочен удар во Брисел“, а насловот со кој француски „Либерасион“ ја опиша расправата за Македонија во Советот на ЕУ, каде што се решаваше безуспешно да и' се даде преговори на Македонија со ЕУ во јуни идната година. Според весникот, грчкиот амбасадор изгубил контрола, па почнал да го навредува австрискиот, порачувајќи му дека „мина времето кога Австрија ја диктираше својата волја на Балканот“ и тоа не на англиски или на грчки, туку на германски јазик. Според „Либерасион“, другите амбасадори биле засрамени од насилниот национализам на грчкиот амбасадор Теодорос Сотиропулос, а ситуацијата ја смирувал претставникот на Франција, Филип Етијен. Еден од аргументите на Сотиропулос бил дека веќе три години трае понижувањето на неговата земја во Брисел, порака кој, според весникот, му ја пратил истовремено и на германскиот амбасадор , откако и Берлин почна да ја турка препораката за Македонија.

Таков епилог, всушност, и се очекуваше на состанокот на амбасадорите на ЕУ, кој според извори од Брисел траел осум часа, а одлуката ја префрли во рацете на шефовите на дипломатиите во вторник. Во нацрт-заклучокот стоеше дека „Европскиот совет во голема мера ја споделува процената на Европската комисија дека политичките критериуми продолжуваат доволно да се исполнуваат и обрнува внимание на препораката да се отворат преговорите за пристапување со поранешната југословенска Република Македонија. Со оглед на можното отворање на пристапните преговори во јуни 2013 година, Советот ќе го испита напредокот во спроведувањето на реформите во контекст на Пристапниот дијалог на високо ниво, врз основа на извештајот што би бил претставен од страна на Комисијата во првата половина на 2013 година. Комисијата се поканува да поднесе навремен предлог за рамка за преговори со поранешната југословенска Република Македонија, во согласност со заклучокот на Европскиот совет од декември 2006 година и воспоставената практика, која, исто така, ги зема предвид добрососедските односи“. Во врска со односите со соседите, нацрт-верзијата предвидува дека одржувањето добрососедски односи, вклучувајќи ја и потребата за изнаоѓање компромисно и заемно прифатливо решение за прашањето за името под покровителство на Обединетите нации, останува од суштинско значење.

„Постои потреба долготрајните разговори за прашањето за името да се донесат до дефинитивен заклучок без одложување. Советот го поздравува импулсот, кој е генериран од последните контакти меѓу двете страни, по грчкиот предлог-меморандум за разбирање. Советот е охрабрен и од последните контакти со посредникот на ОН“, стои во предложениот заклучок, што не пројде во петокот.

Притоа, во предлог се наведува најчесто споменуваната варијанта за Македонија досега, а тоа е почеток на т.н. скрининг-процес со отворање на поглавјата 23 и 24.

„Водејќи сметка за новиот пристап кон пристапните преговори, што се однесува на поглавјата за судството и основните права и правдата, слободата и безбедноста, Комисијата, исто така, се поканува да спроведе процес на аналитички преглед на законодавството на ЕУ за овие поглавја“, стои во предлогот.(Н.Р.)