10.12.2012, 16:02 Внимателно на голомразицата
Завеани патишта, сообраќајни незгоди и долги колони на патиштата предизвика снежното невреме кое ја зафати земјава
Голомразица, завеани патишта, сообраќајни незгоди и долги колони на патиштата. Снежното невреме кое што ја зафати земјава, предизвика проблеми на неколку патни правци на кои се случија сообраќајни незгоди, во кои за среќа нема жртви. Во текот на вчерашниот ден сообраќајот беше нормализиран и како што информираа од Авто-мото сојузот на Македонија (АМСМ), во попладневните часови беше укината и последната забрана за движење на тешки товарни возила на патниот правец Струга-граничен премин Ќафасан.
Голомразицата предизвика страотна несреќа кај Демирхисарската клисура, каде два камиони паднале во проволија во близина на Градец. Возачите на камионите со штипски и со грчки региста��ски таблички се повредени при судирот на двете товарни возила. До несреќата дошло завчера околу 20 часот, а според полицијата причина за излетувањето на камионите е лизгавиот пат кои поради снежните наноси бил исклучително ризичен на делот Демир Капија – Удово.
На автопатот Скопје - Велес - Градско поради голомразицата се случија две сообраќајки кои го блокираа патот. Првата беше пред наплатната рампа кај Сопот, кога камион шлепер поради подмрзнатиот коловоз го попречил одвивањето на сообраќајот. Во камионот удрил и автомобил, но нема повредени. Поради ова на автопатот имало километарска колона.
На делницата од автопатот Велес – Градско, се случиле две сообраќајки на неколку стотина метри. Во првата се судриле две возила без потешко повредени. Втората, пак, била кај селото Ногаевци, кога камион излизгал од патот, по што на него налетало патничко возило. Притоа повредени се четворица патници, еден од камионот и тројцата од автомобилот. Од Велешката болница велат тие се со потешки повреди, но се надвор од животна опасност.
Поради голомразицата, сообраќајот на одредени патишта беше прекинат со часови, а патниците се жалат од Прилеп кон Скопје, патувале и по седум часа. Вчера изутрина беше отстранет и одронот од карпи и земја од регионалниот пат Ресен - Стење, кај местото викано Сирхан, на еден километар пред Отешево, поради кој беше блокиран патниот правец. Како што соопшти Дирекцијата за заштита и спасување, во активностите за расчистување на патот беа ангажирани подрачното одделение на Дирекцијата за заштита и спасување од Ресен, како и од ЈП „Македонија Пат“ - Битола.
„Со употреба на соодветна градежна механизација и со вонредни напори на лицата кои беа ангажирани под доста студено време во текот на ноќта патниот правец целосно беше расчистен од одронетиот материјал и патот беше ставен во функција. ПС Ресен за цело време на акцијата го обезбедуваше теренот за полесно и побрзо расчистување на патниот правец“, велат од Дирекцијата.
И сообраќајот на автопатот Скопје-Велес-Гевгелија вчера се одвиваше без застој, но отежнато поради опасност од појава на голомразица на осојничавите места. Од Македонијна пат предупредуваат да се вози со соодветна зимска опрема и тврдат дека имаат доволно сол и песок за зимава.
|
