(ФОТО) Ибраими ја донесе првата квалификациска победа

Со прецизен удар од белата точка, македонската репрезентација славеше над Србија со 1:0 на „Филип Втори“

Известува: НИКОЛА БУРАГЕВ

ФОТО: Петр Стојановски и Киро Попов

Македонската фудбалска репрезентација ја забележа првата победа во квалификациите за СП 2014 во Бразил, откако вечерва на „Филип Втори“ во Скопје пред 20.000 гледачи ја совлада Србија со 1:0 (0:0). Ова е всушност и прв триумф на Македонија на еден официјален меч против српската репрезентација.

Стрелец на победоносниот гол беше Агим Ибраими со прецизен удар од белата точка во 59. минута. Во казнениот простор на Србите беше соборен Ферхан Хасани по теледиригираното долго додавање на стрелецот Ибраими, а црвен картон за стартот заработи Томовиќ.

Нашата селекција со мудра игра ја казни неорганизираноста на противникот во нападот и конечно ја дочека својата вистинска шанса по 15 минути во вториот дел. Со фудбалер повеќе до крајот имавме уште неколку сериозни закани и паметно и зрело го привршивме мечот за прв целосен плен во овој квалификацики циклус. 

Македонија играше со крајно изменет состав во однос на петочниот дуел против Хрватска. Селекторот Јаневски изврши дури седум измени во почетната постава, а пред вечерашниот меч стигна информација и дека Попов и Ристиќ поради недисциплина биле исфрлени од националниот тим. Поради два жолти картона недостасуваше капитенот Горан Пандев, а Шиков отсуствуваше поради повреда.

Селекторот Чедомир Јаневски беше презадоволен од големиот триумф. „Сакам да им честитам на фудбалерите што успеаја да победат и што им донесовме радост на фановите. Покажавме дека можеме да одиграме добро против една силна и незгодна екипа како што е Србија, и на крајот да славиме. Повикав 23 играчи, на секоја позиција по двајца, јас во ниту еден момент не се сомневав дека овие млади фудбалери ќе го дадат максимумот. Ова е убав ден за македонскиот фудбал, но да не се залажуваме, треба да бидеме реални и да кажеме дека ние сме аутсајдери во нашата група. На секој следен меч ќе се обидуваме да го даваме максимумот, да бидеме подобри и да освојуваме бодови, но силите и можностите ни се овие, да се бориме за средината на табелата“, изјави Јаневски.

Со оваа победа, Македонија се израмни со Србија со по четири бода на табелата во групата А, каде на врвот со по десет бода се издвоија Белгија и Хрватска. Белгијците пред своите навивачи ја совладаа Шкотска со 2:0, а со истиот резултат Хрватите во Осијек беа подобри од Велс. На последните две места од табелата, Велс има 3, а Шкодска 2 бода.

(КРАЈ) Мечот заврши. Прва победа на Македонија во квалификациите за СП 2014 во Бразил. Сосема заслужено ја совладавме Србија со 1:0 со голот на Ибраими од пенал во 59. минута

(93') Јалови напади на Србите, Лекиќ млако бие со глава во Пачовски. Уште 90 секунди до победа.

(90') Изминаа регуларните 90 минути, ќе се играат пет минути судиско надополнување. Трета измена во нашата репрезентација, Ристовски на местото на Ивановски.

(85') Втора измена кај Македонија. Шумуликовски на местото на Демири. 

(84') Голема прилика за Србија. Фејса од десетина метри од изгледна позиција бие силно во Пачовски.

(83) Хрватска го совлада Велс со 2:0, а Белгија поведе против Шкотска со голот на Бентеке.

(76') Тошиќ од 15-тина метри шутира над голот на Пачовски. Трета замена кај Србите, Сулејмани влезе на местото на Марковиќ.

(73') Прва замена во нашиот состав, Тричковски на местото на Тасевски.

(70') Пожолте и вториот наш централен дефанзивец, Боби Грнчаров, за стартот врз Марковиќ.

(68') Две измени во српската репрезентација. Лекиќ на местото на Ѓуриќ, а Ивановиќ влезе на местото на Тадиќ. 

(62) Голема шанса за Србија. Тадиќ изведе вистински слалом во нашиот шеснаесетник, но од изгледна позиција за малку шутираше покрај голот.

(59') ГООООООООООООООООООООЛ за Македонија (1:0). Агим Ибраими прецизен од белата точка.

(58') Пенал за Македонија. Хасани соборен во шеснаесетникот по фантастичното долго додавање на Ибраими. Црвен картон за Томовиќ по стартот над Хасани.

(49') Со голот на Едаурдо во 57. минута, Хрватска поведе со 2:0 против Велс во нашата група, а во дербито на вечерашните квалификациски дуели, Шпанија пред крајот на првиот дел води против Франција со 1:0. Голот го постигна дефанзивецот на Реал, Серхио Рамос.

(47') Вториот дел почна со иницијатива на гостите, а по трет пат од слободен удар се закани Коларов. Неговиот удар со многу мака го скроти Пачовски.

(ПОЛУВРЕМЕ) Завршија првите 45 минути без постигнати погодоци. Гостите беа поопасни во првите 20-тина минути, но финишот на првиот дел им припадна на нашите репрезентативци, кои имаа неколку изгледни прилики за гол.

(43') Извонредна прилика за Мирко Ивановски, кој одлично се ослободи по една долга топка, но непрецизно биеше од десетина метри откосо.

(39') Најзрела шанса за Македонија. Одличен пас од Тасевски до Хасани, но нашиот напаѓач, иако сам пред голманот Бркиќ си даде предолг фор.

(33') Алекандар Коларов уште еднаш се закани од слободен удар, но неговиот шут од 25 метри заврши крај левата статива на Пачовски.

(29') Жолт картон за Николче Новески по стартот над Ѓуричиќ. Коларов опасно биеше од слободниот удар по фаулот, но топката за половина метар заврши покрај дирекот.

(26') Тасевски во стилот на Ракитиќ. Од слична позиција од слободен удар сакаше да го изненади Бркиќ, но топката за малку заврши над пречката.

(25') Непријатна информација од нашиот табор. Непосредно пред мечот со Србија изби голем скандал, откако од националниот тим поради недисциплина се исфрлениГоран Попов и напаѓачот Стевица Ристиќ.

(20') Во рамките на групата А, Хрватска на полувреме во Осијек води против Велс со 1:0. Стрелец на погодокот беше Манџукиќ во 27. минута.

(14') Израмнета игра на средината на теренот. Како да се плашат и двете репрезентации од прв потег и ризик. Изненадување во српскиот состав е неиграњето на дефанзивецот на Челзи, Бранислав Ивановиќ. На негово место во првата постава на десната бековска позиција е Ненад Томовиќ.

(7') Прв удар на македонската репрезентација. Демири со глава биеше по првиот корнер, неговиот шут го скроти голманот Бркиќ.

(2') Натпреварот започна, а првиот удар го упатија гостите преку Тадиќ кој од 20-тина метри шутираше на голот.

(20:28) Мал инцидент. Српската национална химна беше дочекана од концерт свирежи од нашите навивачи, додека за време на интонирањето на македонската химна, српските фудбалери, стручниот штаб и илјадата српски навивачи коректно ракоплескаа. Изгледа заборавивме колку срдечно бевме пречекани на Европското првенство во ракомет во Ниш и во Белград.

(20:25) Македонските и српските фудбалери се веќе на теренот за интонирањето на државните химни. Дури седум измени во составот на нашиот национален тим во однос на дуелот со Хрватска. Капитенот Горан Пандев не игра поради парни картони, а Шиков отсуствува поради повреда.

(20:21) Нешто послаба посетеност во однос на мечот со Хрватска, но сепак убава атмосфера на трибините пред почетокот на средбата.

(20:16) Играчите на двете репрезентации го завршија загревањето и се очекува наскоро да истрчаат на теренот на „Филип Втори“ предводени од судиската тројка од Данска.

(20:08) Состави: Македонија: Пачовски, Георгиевски, Лазевски, Новески, Грнчаров, Демири, Глигоров, Тасевски, Хасани, Ибраими, Ивановски. Селектор: Чедомир Јаневски.

Србија: Бркиќ, Томович, Бишевац, Настасиќ, Коларов, Игњовски, Фејса, Тошиќ, Тадиќ, Марковиќ, Ѓуричиќ. Селектор: Синиша Михајловиќ.

Судија: Бас Нијхуис од Данска