Јубилејна 50. Галичка свадба на 14 и 15 јули

Даница Тортеска (27) и Трајче Лозановски (29) се избраните ликови на 50. јубилејно издание на манифестацијата Галичка свадба. Младата преведувачка со потекло од Галичник и машинскиот инженер од Скопје, се зетот и невестата на Галичката свадба.

- „По потекло сум галичанка и често имам учествувано како статист на Галичката свадба“, вели невестата Даница Тортеска. „Си имав во план дека кога ќе дојде денот за мојата свадба, тоа ќе го сторам на оваа манифестација, иако не знаев дали мојот избраник ќе се согласи“ - признава Даница.

Зетот Трајче на признанието на својата идна сопруга ни одговори: „Нас веројатно не' избраа меѓу петте пријавени двојки, за сватовите на свадбата да можат да се ориентираат според зетот“ - алудирајќи на сопствената висина, додавајќи дека организаторите се помачиле да пронајдат носија со неговата величина.

Манифестацијата Галичка свадба со извршување на сите обичаи се случува два дена (сабота и недела), а „сватовите“ и настаните почнуваат да се случуваат уште во петок навечер. Годинава културните случувања, кои се редовен придружен елемент на традиционалните свадбени обичаи, започнуваат со концертот на етно-групата „Калевала“ во сабота навечер, а завршуваат со традиционалната изведба на орото „Тешкото“ од КУД „Кочо Рацин“.

Организаторите на Галичка свадба, МЗ Галичник, размислуваат во иднина да има една главна манифестација на свадбата, а понатаму во текот на летото секој викенд да има репризни изданија со другите пријавени кандидати за зет и невеста. Или пак на главната манифестација, покрај избраниот пар, свои моменти да имаат и другите пријавени парови. Сепак, тие размислувања се оставени отворени за некои други изданија на Галичката свадба.

Галичката свадба е само почеток на Галичкото културно лето, во чии рамки од 10 до 12 август ќе се одржи Книжевната колонија, а од 15 до 18 август- Ликовната колонија. По повод јубилејното 50. издание на Галичката свадба, во септември ќе биде издадена монографија. (Ј.П.)