СДСМ манипулира и врши притисок, струјата меѓу најевтините во ЈИЕ

РКЕ во целост ги отфрла обвинувањата на СДСМ и за овој политички притисок ќе се обрати до релевантните меѓународни тела од областа на енергетиката

Регулаторната комисија за енергетика на Република Македонија енергично и во целост ги отфрла обвинувањата на СДСМ во однос на цената на струјата и потенцира дека во својата работа се раководи од Законот, меѓународните правила и обврски и од водење сметка за најдобрите интереси на Република Македонија.

- Нашите одлуки обезбедуваат почитување на Европските директиви и на намалување на вкупните трошоци во Републиката, што е битно за економијата. И со овие одлуки со кои ги прифаќаме обврските преземени со меѓународни акти, Република Македонија има повторно втора најниска цена на електричната енергија во регионот на Југоисточна Европа и е една од ретките држави во кои постои евтина тарифа, стои во денешното соопштение од РКЕ.

РКЕ за овој политички притисок кој го врши СДСМ, стои во соопштението, ќе се обрати до релевантните меѓународни тела од областа на енергетиката.

- Република Македонија е единствена земја во регионот во која што постоеше евтина тарифа во текот на денот. Единствено во Република Македонија се до 31 јули 2012 година се применуваше евтина тарифа во текот на денот. Во сите држави кои што произлегоа од поранешна Југославија, евтината тарифа во текот на денот е укината, а во некои од нив (Србија и Хрватска) е укината и во недела. Сите овие земји го сторија тоа заради намалување на вкупните трошоци на своите електроенергетски системи, се појаснува во соопштението од РКЕ.

Комисијата уште еднаш потенцира дека цената на електрична енергија за домаќинствата во Република Македонија е речиси најниска во регионот, како и во Европа. Словенија, Грција, Албанија, Хрватска, Турција, Романија, Бугарија и Црна Гора имаат поскапа струја од Македонија.

Како пример за времетраењето на евтината тарифа во земјите од поранешна Југославија се посочени Србија, Хрватска, Грција и Бугарија каде што воопшто нема евтина тарифа, додека Македонија и Црна Гора имаат во недела.

РКЕ своите одлуки ги образложува со потпишување на Договорот за основање енергетска заедница, како и обврските што произлегуваат од Законот за енергетика, врз основа на кои Комисијата е должна да ги донесе сите подзаконски акти кои се битни за натамошната целосна либерализација на пазарот на електрична енергија, а особено да реализира тарифна реформа. Од овие причини, се посочува, Регулаторната комисија за енергетика на 30 јули оваа година донесе методологија за пресметка на цените на пресметковните елементи по кои производителот на електрична енергија ја испорачува на снабдувачот на електрична енергија за тарифни потрошувачи и снабдувачот во краен случај со електрична енергија, тарифни системи за пренос на електрична енергија, за нејзина дистрибуција, како и Правилник за цени за снабдувачот во краен случај, потоа се донесени и тарифни системи за изменување и дополнување на тарифен систем за продажба на електрична енергија на тарифни потрошувачи и за изменување и дополнување на тарифен систем за продажба на електрична енергија на тарифни потрошувачи приклучени на дистрибутивниот систем во сопственост на АД ЕЛЕМ – Скопје.

Единствена причина за укинувањето на евтината дневна тарифа во периодот од 13 до 16 секој ден, освен недела, подвлекува РКЕ, е да се намалат трошоците за увоз на електрична енергија. Во Република Македонија електричната енергија се увезува во текот на денот по цена која што е повисока за 50 проценти од ноќната енергија. Од друга страна, АД ЕЛЕМ располага со вишоци на електрична енергија во ноќните часови, кои што доколку не се преземат од потрошувачите создаваат дополнителни трошоци на АД ЕЛЕМ од 8 до 10 проценти, заради потиснување на термоелектраните Битола и Осломеј. Со оваа мерка, се вели, се испраќа сигнал до потрошувачите на електрична енергија дел од својата потрошувачка на електрична енергија во текот на денот да ја префрлат во ноќните часови, по 22 часот. На овој начин, укажуваат, ќе се намалат трошоците за увоз на електрична енергија во дневниот период и до максимум ќе се искористат домашните производни капацитети, со намалени трошоци од 8 до 10 проценти, поради што ќе се намали и цената на електрична енергија на крајните потрошувачи, вклучувајќи ги домаќинства.

Во периодот од септември 2009 година до јуни 2011 година, со финансиска поддршка на Европската Комисија, РКЕ реализираше проект за институционално зајакнување, кој што беше во на��голем дел фокусиран на тарифните реформи во електроенергетскиот сектор. Една од најбитните препораки на реномираните меѓународни консултанти, се подвлекува во соопштението, беше укинување на евтината дневна тарифа во периодот од 13 до 16 часот за секој ден поради непотребно создавање дополнителни трошоци кои што ја зголемуваат цената на електрична енергија.