Инвестицискиот бум ќе се врати в година

Иако поради кризата некои компании ги одложиле одлуките за инвестирање, немало индикации за комплетно откажување од проектите, вели министерот Веле Самак

Маја Томиќ

Покрај рецесијата и економската неизвесност, Владата и годинава не се откажува од проекти за привлекување странски инвестиции. Како и досега, и оваа година ќе се продолжи со инвестициските проекти и преговори со повеќе компании. Според Веле Самак, министер за привлекување странски инвестиции, се прават сите напори за да се дојде до ситуација странските компании да се убедат да инвестираат во Македонија, иако поради кризата, кај некои се чувствува доза на несигурност за инвестирање на други пазари.

„Постои неизвесност за нови вложувања затоа што во ЕУ има рецесија, која, дефинитивно, може да влијае врз одлуките на компаниите. Затоа сме фокусирани на конкретни земји од каде што фирмите бараат излез преку подобра пазарна позиција или подобри услови за експанзија“, изјави Самак за „Утрински весник“.

Тој додава дека европската криза ќе продолжи, како и големите структурни проблеми. Покрај фискалната криза и долговите, веќе постои и огромна невработеност особено кај младите лица.

„Во ЕУ е очигледна фрагментација на земји-членки кои успешно се соочуваат со проблемите и земји кои се' уште бараат решенија, гледајќи во ретровизор. Ваквата неизвесност им годи само на фирми кои имаат добра ликвидност и бараат нови инвестиции со освојување нови пазари“, посочува Самак. Тој додава дека кај некои компании веќе има одложување на времето за донесување одлука за период од два-три месеци, но дека засега нема индикации за комплетна смена на стратегија или откажување од проекти.

Иако во десетте месеци од минатата година вредноста на странските инвестиции, според Народна банка на Македонија, изнесуваа само 50,6 милиони евра, сепак, Владата е задоволна од постигнатото на инвестициски план. Според Самак, ланските резултати се најдобрите во споредба со последните десет-дваесет години.

„Прв пат многумина видоа четири-пет нови фабрики, како и отворање нови погони. За потсетување, ’Кемет електроникс‘ го започна производството со 100 вработени, ’Џонсон Мети‘ го дуплира капацитетот и е на пат да постигне 500 вработувања, ’Џонсон контролс‘ во Штип е при крај со изградбата, а веќе остварува извоз од привремен погон, ’Продис‘ и ’Текнохозе‘ започнаа со производство, ’Кромберг и Шуберт‘ во Битола веќе има над 240 вработени и ја заврши изградбата на фабриката, а ’Дрекслмаер‘, покрај фабриката во Кавадарци, веќе вработува речиси 500 луѓе овој месец и извезува делови за ’Мерцедес‘. И на крајот, холандската ’Ван Хол‘ е во тек со изградбата на фабриката. Тоа се вкупно над 7.000 нови вработувања во првата фаза на сите овие фабрики. Се надевам дека , ако не оваа, тогаш наредната година ќе го повториме овој резултат“, нагласува Самак.

Во скоро време, како што неодамна најави министерот Самак, во Велес ќе никне нова гринфилд-инвестиција. За неа имало голем интерес од една германска фирма, која го пикирала токму Велес, иако посетила и други градови во земјава каде што ги разгледувала можностите за инвестирање. „Претставници на оваа компанија веќе два пати беа во Македонија. Работиме интензивно со Општината за да бидат подготвени со понудата, а моментно преговараме интензивно со фирмата за да одлучи да инвестира токму кај нас. Се надевам на позитивен одговор наскоро“, вели Самак.

Тој додава дека моментно има многу проекти на кои се работи интензивно во соработка со Агенцијата за странски инвестиции.

Еден од нив што ќе се реализира наскоро е интеграција на домашните фирми во процесот на привлекување странски инвестиции. Во таа насока, како што вели Самак, ќе се организира конференција во која ќе се поврзат странските фирми, сегашни и идни, со домашните потенцијални партнери. „Со тоа ќе зајакне економијата и ќе ја зачуваме повеќе додадена вредност во Македонија. За неколку недели ќе имаме и детали за оваа конференција која ќе стане редовна практика“, посочува Самак.