Мое ќоше

Брат Љубе и брат Јохан

Ерол Ризаов

Животната сага на Љубе Бошковски и на Јохан Тарчуловски е тажна и многу поучна приказна

Го оставам домот и имотот во Македонија и со синот се повлекувам во Хрватска. Ми го земаа Љубе, а сега сакаат да ни ја земат и куќата. Ова, крајно разочарано како трагичен епилог на една голема животна драма го соопшти Виолета Бошковска, сопруга на Љубе Бошковски, по одлуката на Апелацискиот суд да му ја намали казната од седум на пет години со конфискација на имот во вредност од 30.000 евра. Животната сага на Љубе Бошковски и Јохан Тарчуловски не би можела да биде толку уверлива во ниедно филмско остварување како што судбината сурово им ја изрежира во живо на овие двајца млади луѓе. Приказната за брат Љубе и брат Јохан е од темната страна на Македонија за нејзиниот пат од еден во друг свет. Но, најмногу од се', тоа е нивна лична трагедија и на нивните семејства.

Каубојскиот шешир на Брат Љубе се појави на скопските улици и телевизии уште во 1998 година како Нова sвезда на вмровското небо. Роден за шериф, овој млад правник, дојден од Хрватска, уште кога го доби местото заменик- директор на Дирекцијата за безбедност и контраразузнавање го сврте вниманието на јавноста и на медиумите. Брзо како и сите sвезди напредуваше по орбитата на ВМРО-ДПМНЕ. Во најбурните времиња за Македонија, стаса до министер за внатрешни работи, во период мај 2001 септември 2002 година. Опкружен со многубројни обожаватели, нашиот популарен шериф Меклауд јаваше низ татковината следен од џетсетот и од многубројни новинари и камери. Неговото друштво, далматинската пршута и доброто вино беа престижна влезница во високото друштво. Конфликтната 2001 година од него направи македонски спасител, заштитен бренд на македонштината, единица мерка за патриотизам. Се редат трилери како на филмска лента. Брат Љубе и брат Јохан се главните актери во август 2001 година во скопското село Љуботен кога се убиени во полициска акција повеќе цивили Албанци жители на селото. Потоа следува мистичната улога на брат Љубе во случајот „Раштански Лозја“ пролетта 2002 година кога во полициска акција се ликвидирани седум луѓе. Никогаш не се докажа дали биле терористи или сиромашни економски емигранти. Ослободителната пресуда за обвинетите Врховниот суд на Македонија ја нарече срамна.

Во затворот во Швенинген брат Љубе помина четири години и три месеци како еден од најпознатите затвореници заедно со Слободан Милошевиќ и генерал Анте Готовина. Од затворските денови на брат Љубе во Хаг стасуваа во Македонија секој ден легенди и митови. Вмровските елити одеа во Швенинеген на поклонение како во Ерусалим. Се пееја песни за јунаштвото на брат Љубе. Во 2008 година се враќа од Хаг со ослободителна пресуда, како невин и како голем херој. На скопскиот аеродром слетува со владин авион. Го пречекува лично премиерот Никола Груевски. Тука се и црковните великодостојници и стотици патриоти кои го пречекуваат со леб и сол и вино. Брат Љубе излегува од авионот легнува на земја и ја бакнува македонската почва. Френетични овации Македонија, Македонија победа, победа, брат Љубе, брат Љубе.

Набргу најавува големи политички амбиции со што експресно потемнува неговата sвезда. ВМРО-ДПМНЕ го отфрла како потрошен контаминиран материјал. Возвраќа со формирање политичка партија Обединети за Македонија. Брат Љубе грми против ВМРО-ДПМНЕ во предизборните кампањи за претседател и на парламентарните избори. Горското началство донесува пресуда. На 6 јуни 2011 веднаш по изборите спектакуларно е уапсен сред бел ден од некогаш неговите елитни полициски единици под сомнение за нелегално финансирање на изборната кампања. Брат Љубе оди во притвор каде што по неколку месеци истоштен со видливи психолошки трауми се извинува секој ден јавно за сторените грешки. Сурово ја демантира својатa позната максима. „Македонскиот народ клечи и моли само пред Господ“. Судот пресудува седум години затвор. Седум години во Идризово плус четири години и три месеци во Швенинген речиси 12 години.

Јохан Тарчуловски, кој по брат Љубе станува новиот херој од Хашкиот трибунал, е осуден на 12 години затвор за љуботенските убиства. Згаснатата sвезда на брат Љубе ВМРО-ДПМНЕ му ја осветли на брат Јохан. Вмровците почнаа да одат на поклонение кај Јохан. Тој е новиот јунак кој го спаси брат Љубе кој стана предавник. Типично вмровски. Јохан ја издржува казната во Германија во последно време подзаборавен од вмровскиот врв.

Наместо епилог: и брат Љубе и брат Јохан имаат да одлежат уште по пет години затвор. Приказната за двете судбини не е завршена. Ама и дотука е многу поучна.