Милчо Манчевски добитник на наградата ЦЕИ 2012

Наградата е доделена во рамките на 23. Филмски фестивал во Трст, на 21 јануари

Наградата „ЦЕИ“ што се доделува во рамките на 23. Филмски фестивал во Трст, годинава му припадна на македонскиот режисер Милчо Манчевски за неговата повеќеаспектна, триесетгодишна кариера во филмските продукции. Наградата во висина од 3.000 евра е предадена на одржаната церемонијата за нејзино доделување во Трст, на 21 јануари, од страна на Зоран Јовановиќ, заменик-генерален секретар на Централноевропската иницијатива.

ЦЕИ воспостави долгогодишна соработка со Филмскиот фестивал во Трст, потврдувајќи ги заслугите на иницијативата која со големо внимание ја промовира и поддржува кинематографијата на земјите од истоимениот регион. Посебно го поддржува „Проектот Иствик“, кој ја негува соработката со училиштата и академиите од земјите на Централна и Источна Европа и во Трст привлекува млади режисери, продуценти и сценаристи, нудејќи им можност да учествуваат на фестивалот, и на низа состаноци, семинари и специјални настани.

Како дел од заложбите за поддршка на филмовите од Централна и Источна Европа, ЦЕИ ги подржува и средбите на копродукцијата „Кога Исток го сретнува Запад“, организирани од Регионалниот фонд за аудио-визуелна уметност во покраината Фурланија-Јулијска Краина и Филмскиот фестивал во Трст.

Во посочената за оваа пригода биографија на Милчо Манчевски стои дека е писател, фотограф, филмски критичар, сценарист и режисер кој кариерата ја почнал со снимање кратки филмови, музички видеа и реклами што му донесоа меѓународна слава. „Откако стекна диплома за филмска режија во САД, Манчевски се врати во Македонија – неговиот оригинален извор на инспирација и се посвети на раскажување на сторијата на неговата земја на страсен и автентичен начин, земја за која се бореле многубројни етнички групи, постигнувајќи рамнотежа меѓу моќниот притисок кон современоста и силната приврзаност кон нејзините културни и прадедовски корени“, стои во информацијата од Филмскиот фестивал во Трст. Наброени се и филмските остварувања на Манчевски, но и дел од добиените награди и признанија. (К.Б.)