20.02.2012, 14:59 Ристовски: Барањата на работодавачите ќе бидат разгледани
Министерот за труд и социјална политика Спиро Ристовски очекува предлог-мерките на Организацијата на работодавачи на Македонија (ОРМ) за подобрување на бизнис климата да бидат изготвени како законски измени со цел да можат да се разгледуваат најпрво во Министерството, а потоа и на седница на економско социјалниот совет, и да се види дали е можно постигнување компромис.
- Дополнително ќе се произнесеме како и за секоја друга иницијатива која произлегла во оваа сфера. Во оваа фаза не би сакал да ги коментитрам предложените мерки, бидејќи имаше повеќе забелешки. Станува збор за барање за промена на едно системско решение за што е потребна поголема анализа, рече министерот Ристовски одговарајќи на новинарски прашања по зaвршната конференција на проектот за јакнење на капацитетите на Организацијата на работодавачи на Македонија.
Нашата идеја, рече, е да се постигне донесување законски решенија кои ќе бидат во интерес на сите три страни, иако не секогаш е можно по однос на секое прашање да се постигне консензуално усогласен став со кој ќе настапат сите три партнери.
Минатата недела ОРМ, меѓудругото, побара домашните инвеститори да бидат рамноправни со странските, да се намалат трошоците на фирмите и да се направат измени на законската регулатива за глобите.
Од ОРМ сметаат дека Владата треба да најде начин да ги искомпензира и трошоците кои ја зголемуваат цената на производот и услугата, особено за оние наменети за извоз, а бараат и правилно спроведување на прекршочната постапка. Посочуваат дека од несоодветната информираност на компаниите и лошата едукација на некои инспектори страда бизнисот.
Според ОРМ, потребен е и нов закон за работни односи бидејќи постоечкиот има многу одредби кои се непрецизни и тешко применливи. Во постоечкиот закон, сметаат има правни поими кои не се дефинирани и претставуваат проблем при примената или се во спротивност со други закони. Има одредби кои го оптоваруваат законот и се тешко применливи.
Како тешко применливи ги посочуваат одредбите околу договорот за вработување, менаџерските договори, понудата на нов променет договор пред отказ, одредбите за откажување на договорот за вработување, за прекувремена работа и за користење на годишен одмор. Во постоечкиот закон, според ОРМ, постојат многу нелогични одредби како што се оние за работа на жените ноќе, за прераспределба на работата, за вреднување на работниците од страна на работодавачот, за оспособување на приправникот.
.
|
