Евроминистрите повторно ја спасија Грција од банкрот



Министрите за финансии на државите од еврозоната усвоија втор пакет финансиска помош за Грција од 130 милијарди евра, по повеќе од 12 часа преговори во Брисел. На Грција и се потребни дополнителни средства за да избегне банкрот во март.

Во замена, Атина ќе преземе мерки за намалување на долгот на 120,5 отсто БДП до 2020 година. По пет последователни години на рецесија, грчкиот долг моментно е повеќе од 160 отсто од БДП.

Еврото веднаш зајакна за 0,7 отсто достигнувајќи вредност од 1.328 спрема доларот.

Договорот рано денеска го објави претседателот на групата министри за финансии на еврозоната Жан Клод Јункер. Тој рече дека со тоа се обезбедува „значително намалување на грчкиот долг“ и ќе обезбеди иднина за државата во еврозоната.

- Еврогрупата е во целост свесна за големите напори што граѓаните на Грција веќе ги поднесоа, изјави Јункер и додаде дека се неопходни „дополнителни и заеднички напори на грчкото општество“ за да економијата тргне по пат на одржлив развој.

Шефот на ММФ, Кристин Лагард која учествуваше во преговорите рече дека договорот и „обезбедува на Грција доволно простор за обнова на својата конкурентност“. Таа додаде дека ќе одржи дополнителни разговори со Грција на состанокот на УО на ММФ во втората недела од март.

Новиот договор значи дека приватните кредитори на Грција ќе мора да прифатат загуби од 53,5 отсто од вредноста на обврзниците што ги поседуваат.

Првиот пакет економска помош од 110 милијарди евра не беше доволен за да ја извлече државата од должничката криза.

Во коментар во врска со грчката должничка криза, британски Дејли телеграф наведува дека младите Грци во следните години ќе бидат жртви на строгите економски мерки кои беа побарани во замена за пакетото помош од ЕУ и ММФ.

„Грците силно стравуваат дека лебот, образованието и слободата ќе останат неосвоен копнеж во следните години. Невработеноста меѓу луѓето под 25 години веќе е 48 отсто и се зголеми за една третина од ноември 2010 година. Единствениот одговор за младите е да емигрираат. Најтажен показател е бројот на самоубиства во Грција - во 2008 година бил 2,8 на 100 илјади жители, а лани таа цифра била шест“, наведува Дејли телеграф.

Весникот коментира дека младите Грци не може да бидат виновни за кризата во државата.

„Но, што да кажеме за постарото поколение, кои гласале за корумпирана влада и обезбедувале работни места по роднински или политички принцип. Тоа поколение го почна студентскиот бунт во 1973 година, и донесе демократија. Сега може да се каже дека истото поколение ја урна државата“, коментира Дејли телеграф.

Од друга страна, Њујорк тајмс објавува договорот може да биде пресврт во европската должничка криза која го постави под знак прашање еврото и дека приватните кредитори ќе понесат најголем дел од очекуваните загуби.

„Во Еврозоната веќе се активни построги правила за долговите и буџетскиот дефицит, а политичарите се надеваат да дадат сигнал дека почнува крајот на кризата. Ова што се случи досега, покажува до кој степен Грција е слабото место во групата од 17 држави кои го користат еврото како заедничка валута“.

Вашингтон пост наведува дека одлуката за нов заем и дава време на Грција да ги реши тешките проблеми и да даде гаранции на светот дека банкротот и евентуалните последици од него се спречени, барем засега.

- Грчкиот народ ќе ги даде неопходните жртви за да може државата да обезбеди место во европското семејство, го цитира весникот Евангелос Венизелос, грчкиот министер за финансии.

Според Волстрит џурнал, многумина економисти сметаат дека долго ќе останат нерешени прашањата околу способноста на Грција да исплаќа за заемите.

Весникот ја цитира Кристин Лагард, шефот на ММФ која вели дека економскиот пакет за помош на Грција е многу амбициозен, но и тежок и носи ризици.

„Проблемот е дека грчката економија треба да стане поконкурентна со големо намалување на платите, и државата да го зголеми извозот со што економски ќе закрепне. Но, од друга страна намалувањето на платите ќе ја продлабочи дополнително рецесијата во Грција“, наведува весникот.