Кој е грчкиот пријател на Метју Нимиц?

Солунскиот бизнисмен Ефтимијадис и Нимиц се пријатели од 1989 година, пред медијаторот да биде инволвиран во македонско-грчкиот спор

Од нашиот дописник
Миркица Поповиќ



Атина - Медијаторот Метју Нимиц, освен што преговараше во Скопје и во Атина, најде малку време и за дружење со старите пријатели. Единствениот слободен ден меѓу двете средби, во вторникот, 21 јануари, медијаторот му го посвети на својот долгогодишен пријател, солунскиот бизнисмен Никос Ефтимијадис.

Нимиц и Ефтимијадис заедно со грчкиот преговарач Адамантиос Василакис во вторникот прошетаа низ археолошките музеи на Солун и на Пела, а таквата можност медијаторот можеше да си ја дозволи бидејќи од Скопје вообичаено заминува за Солун со автомобил , па оттаму фаќа авион за Атина.

За тоа кој е грчкиот пријател на Нимиц најмногу пишуваат солунските медиуми откако овој познат солунски бизнисмен во 2010 година ја најави својата кандидатура за градоначалник.

Ефтимијадис (тој е претседател на големата земјоделска компанија „Агритекс“) и Нимиц се пријатели уште од 1989 година. Како што изјавил Ефтимијадис, со специјалниот претставник на Обединетите нации за спорот за името се запознале на Кипар, пред Нимиц да ја добие оваа функција бил амбасадор на САД во Никозија.

„Се запознавме на конференција на Кипар, по една расправија со новинар од Турција за грчко-турскиот спор. Оттогаш сме многу добри пријатели“, објаснил Ефтимијадис на прес-конференција во 2010 година, додавајќи дека со медијаторот заедно ги посетиле вселенскиот патријарх во Истанбул, биле во Вергина и на Света Гора.

Бизнисменот споменал дека постојано ја користи можноста да ги образложи грчките позиции пред медијаторот. Ефтимијадис ја поддржува грчката црвена линија за сложено име со географска одредница и за ерга омнес употреба, а ја критикувал политиката на македонската Влада како „иредентистичка“. Според медиумите, Ефтимијадис смета дека со името треба да биде решено и прашањето за идентитетот за во иднина да се избегнат нови проблеми меѓу двете страни.

Покрај долгогодишното пријателство, Нимиц и Ефтимијадис се дел од управниот одбор на невладината организација Центар за демократија и помирување на Југоисточна Европа, која работи на помирување и подобрување на соработката меѓу државите од Западен Балкан. Солунскиот бизнисмен го бие добар глас во втората грчка престолнина. Ефтимијадис освен што го раководи долгогодишниот семеен бизнис во агротехнологијата, пред неколку години бил и претседател на Стопанската комора на северна Грција. Ефтимијадис влезе во трка за градски татко на Солун без поддршка од некоја партија во ист период со својот пријател Јанис Бутарис, кој ги доби изборите за градоначалник

Весникот „Македонија“ пренесува дека покрај пријателството со Нимиц, Ефтимијадис има добри врски со семејството Буш и со голем број американски дипломати. Блиски пријатели на Ефтимијадис тврдат дека секој нов конзул на САД во Солун при првото доаѓање се запознава со Ефтимијадис, кој е добар пријател со Николас Барнс, поранешен амбасадор на САД во Атина, како и со поранешниот заменик-државен секретар за надворешни работи и член на Советот за национална безбедност на САД, Ричард Шифтер.

Според весникот, Ефтимијадис е добро запознаен со проблемите и темите на Балканот и директно учествува со активности преку асоцијацијата на 45 бизнисмени и инвеститори во регионот.

Ефтимијадис е роден 1944 година во Солун, а неговите родители се од источна Тракија. Студирал на Земјоделскиот факултет во Солун, а магистрирал во Англија. По војната во Југославија, Ефтимијадис почнал да го шири бизнисот и во Србија, Бугарија и Романија, а според информации во грчките медиуми, соработува и со компании од Македонија и од Романија. Освен бизнисот, солунскиот пријател на медијаторот Нимиц ја основал и организацијата Културна компанија на бизнисмените од Северна Грција, а дел е и од управниот одбор на Државниот музеј на современата уметност. Тој, исто така, е колекционер на стари автомобили.