14.01.2013, 11:42 И тоа се случи - Лејкерси победија
„Езереџиите“ го совладаа Кливленд (113:93) и ставија крај на серијата од шест порази во низа
Лос Анџелес Лејкерси конечно успеаја да стават крај на црната серија, во „Стејплс центарот“ е совладан Кливленд со 113:93. По шест порази во низа „езерџиите“ дојдоа до првиот триумф во 2013 година. Веќе по првата четвртина беше јасно дека Коби Брајант и неговите соиграчи ќе го добијат овој меч. Враќањето на Двајт Хауард секако имаше свое влијание за крајниот триумф, центарот на Лејкерси средбата ја заврши со 22 поени, 14 скока и две асистенции.
„Кога играме на овој начин, со сигурност победуваме и тоа убедливо“, е кратката изјава на Хауард по средбата.
Кога станува збор поените тука нема дилеми, водечката сила во тимот од Лос Анџелес беше Брајант со 23 поени, а додека Стив Неш постигна скромни десет поени и девет асистенции.
Актуелниот вицешампион Оклахома добрата игра ја претвори во 29 триумф сезонава. Пред Кевин Дурант и неговиот тим „падна“ Портланд (87:83), кој пак и покрај поразот не дозволи да биде надигран пред својата публика.
По одличната партија против Лејкерси Дурант уште еднаш ги покажа своите напаѓачки способности, противникот го „почести“ со 33 поени, шест асистенции и четири скока. Расел Вестрбук како и секогаш беше на ниво на задачата, овој пат за малку му недостасуваше да дојде до трипл-дабл учинок (18 поени, 8 скока и 9 асистенции).
Екипата на Сан Антонио традиционално се наоѓа меѓу екипите кои што имаат најдобра предност на домашен терен, па затоа ни малку не е зачудувачки триумфот над Минесота (106:88). Ова е 12 победа во низа за Спарси кога станува збор за мечевите во Сан Антонио.
Тони Паркер со 20 поени беше најефикасен, а добра игра прикажа Тим Данкан постигна 14 поени заедно со девет скока и седум блокади. За неговата игра по средбата коментираше стратегот на домашниот состав Грег Попович: „Не мислам дека ова е големо изненадување. Седум е убава бројка, но тој ова го прави секоја вечер. Игра најдобро што може без разлика дали се работи за одбраната, блокадите, бранењето на кошот“.
Резултати: Њујорк - Њу Орлеанс 100:87, Торонто - Милвоки 93:107, Бруклин - Индијана 97:86, Сан Антонио - Минесота 106:88, Денвер - Голден Стејт 116:105, Портланд - Оклахома 83:87, Лос Анџелес Лејкерс - Кливленд 113:93.
|
