Како ќе изгледа Европа до 2035 година

Експертска група на чиешто чело се наоѓаат Збигњев Бжежињски и Самјуел Хантигтон ја направија картата на „Нова Европа“

Руски експерти, врз основа на документи од ЦИА, руската служба ГРУ и уште неколку извори, направија карта на Европа во 2035 година. Албанија ќе се соедини со Косово и со дел од Македонија и ќе се формира голема Албанија. Босна ќе биде поделена меѓу Србија и Хрватска. Сериозни промени ќе има во Шпанија, Франција и во Велика Британија.

Европа во наредните дваесетина години ја чекаат огромни промени, сметаат руските експерти, кои врз основа на анализа на документи на американската ЦИА, руската служба ГРУ и експертска група на чиешто чело се наоѓаат Збигњев Бжежињски и Самјуел Хантигтон ја направија картата на „Нова Европа“.

Серијата големи територијални промени ќе почне во Британија, каде што Шкотска ќе прогласи независност, што ќе претставува иницијална каписла за обединување на Ирска, пишува рускиот „Експрес“.

Каталонците и Баскијците ќе прогласат независност од Шпанија, што ќе има последици и во соседна Франција, каде што, како што наведуваат експертите, ќе почне „распадот на мултикултурализмот“. На југот од Франција ќе се формира исламска држава, а областа Лорен ќе и' се приклучи на Германија.

Ќе се распадне и Белгија, а Фламанците ќе и' се приклучат на Холандија, додека Италија ќе се распадне на богатиот север и сиромашниот југ, а Сардинија и Сицилија ќе прогласат независност.

Територијата на Босна и Херцеговина ќе биде поделена меѓу Србија и Хрватска, а ќе се формира и голема Албанија, која ќе ја сочинуваат Албанија, Косово и дел од Македонија.

Тажна судбина, сметаат руските аналитичари, ја очекува и Полска, која ќе мора да се откаже од делови од територијата по серија нови спогоди меѓу Русија и Германија. Белорусија ќе исчезне и ќе стане дел од Русија, како и делови од балтичките држави и Украина. Големи промени се очекуваат и на Кавказот, бидејќи се смета дека Русија нема да може да ги задржи Чеченија и Дагестан. (РТС)