Велигденски благослов со знамето од Вергина

Поглаварот Стефан им го честиташе Велигден на православните верници стоејќи покрај шестнаесеткракото знаме на Вергина

Знамето со шеснаесеткракото сонце од Вергина го одвлече вниманието на верниците, додека првиот човек на Македонската православна црква, г.г Стефан упатуваше јавна Велигденска порака преку телевизиските екрани. На снимката која се вртеше на телевизиите, поглаварот на МПЦ го кажуваше Велигденското послание, а од неговата десна страна покрај црковното знаме можеше да се види знамето на Вергина.

Официјално, не се објаснува зошто знамето од Вергина, кое инаку е симбол на античките Македонци стои до официјалното црковно знаме. Непишана пракса е телевизиите да земаат претходно снимена порака од поглаварот на МПЦ, така што никој не може да потврди дали оваа снимка е направена во кабинетот на првиот човек на МПЦ или е од друга локација.

Вчера побаравме, но не добивме одговор од кабинетот на првиот човек на МПЦ зошто знамето на Вергина е во прв план на снимките со Велигденската порака на г.г Стефан. И, што имаат заедничко античкото сонце од Вергина и христијанството, чии корени се појавуваат четири века подоцна. Иако не е тајна дека Сонцето од Кутлеш или Вергина се појавува и во многу црковни објекти, фрески, икони, монети итн.

Во јавноста постојат полемики за т.н антиквизација што се доведува во корелација со поставувањето на скулптури од античкиот период, поставувањето на антички имиња. А, знамето покрај кое стои поглаварот на МПЦ се појавува токму во време на бурната расправа во јавноста за тоа дали постои или не антиквизација.

Изминатиов период токму поставувањето на античките имиња на јавни објекти ги провоцираше и ги зовре страстите кај нашиот јужен сосед, Грција, која во неколку наврати остро реагираше на случувањата во земјава. Познато е дека Македонија токму поради реакциите од Грција го смени изгледот на некогашното државно знаме и шеснаесеткракото сонце го смени со осумкрако. Но, дали сега повторно Грција ќе реагира и на шеснаесеткракото знаме на Вергина, покрај кое официјално на верниците им се обрати првиот човек на МПЦ, г.г Стефан? (Ж.Х.З.)