Какви се врските на менаџерот на „Метрудхем“ со Владата

Од директор на Управата за јавни приходи до менаџер на Прилепскиот тутунски комбинат, а сега управител на фирмата што ја има Топилница - вака се движи кариерата на Тони Димитриоски

Соња Маџовска
Сањ�� Наумовска


Од прв даночник, директор на Управата за јавни приходи, до менаџер на загубарот Тутунски комбинат Прилеп, а моментно, актуелен управител на фирмата „Метрудхем“, сопственик на Велешка Топилница.

Интересна е кариерата на господинот Тони Димитриоски. Неговото појавување, пред еден месец, како директор на „Метрудхем“, фирма која сака да ја рестартира Велешката Топилница, ја збуни јавноста со неговиот последен ангажман. Кој беше човеков, познат е? Беа првите коментари. А после почна да се враќа меморијата и да се одмотува клопчето.

Тони Димитриоски и' станува познат на јавноста, кога од управител на градската Управа за јавни приходи, станува директор на Управата за јавни приходи на Македонија, во 2001 година, по смената на Сашо Станинов. Но, овој негов ангажман не трае многу, само една година. Директор на УЈП е до 2002 година. Неговото директорување во Управата е во време кога министер за финансии и негов надреден беше, сегашниот премиер Никола Груевски. Затоа и Димитриоски се сметаше за човек од доверба, и еден од најблиските соработници на Груевски. Во тоа време во јавноста се шпекулираше дека нивното познанство датира уште од студентските денови, и често се дружат низ скопските кафулиња.

А оваа шпекулација, стана уште позвучна, кога на крајот од 2006 година Владата на Груевски го назначува Димитриоски за генерален директор на прилепскиот Тутунски комбинат. Во ноември 2006 година заедно со Димитриоски во Прилеп патуваат и другите, како што ги нарекувале во Прилеп „скопскиот тим“ кој требал да го дигне на нозе Комбинатот. Во тимот, како членови на Управен одбор на Комбинатот, биле и Драган Мартиновски, како претставник на државниот капитал, сега директор на Македонската банка за подршка на развојот, Зоран Јолевски, поранешен член на кабинетот на починатиот претседател Борис Трајковски, а сега амбасадор на Македонија во САД и Виктор Мизо, до неодамна директор на Агенцијата за странски инвестиции, а сега прв човек на Дирекцијата за технолошко индустриски развојни зони.

Но, наместо да го подигнат прозиводството во Тутунскиот комбинат, прилепчани коментираа дека со управувањето на „скопскиот тим“ започнало тонењето на компанијата, која до ден денеска не може да застане на нозе. „Бараме овие менаџери да заминат, бидејќи наместо да ја поправат финансиската состојба - тие ги подлабочија проблемите. Немаат никакви познавања за тутунот и тутунската индустрија“, беа дел од изјавите на претседателот на Синдикатот на Тутунски комбинат, Димитар Ѓорчулески, во 2008 година.

Синдикатот тогаш обвинуваше дека само трошеле пари за пат на релација Скопје-Прилеп, а не знаеле ништо за тутунскиот бизнис. Немале никаков слух за барањата на работниците, а токму во тој период најголем дел од нив биле праќани на принуден одмор. По две години неуспешно менаџирање со Комбинатот, на инсистирање на Синдикатот, целиот тим си поднел оставки. Тогаш се коментираше дека тие биле изнудени, по многу бројните забелешки од вработените кои постојано и биле презентирани на Владата. Две години траеше кариерата на Димитриоски, како директор на Прилепскиот тутунски комбинат.

Отогаш наваму, неговото име не се поврзува со некоја јавна функција. Затоа јавноста беше изненадена кога се огласи како директор на „Метрудхем“. Но, она што очигледно не се променило во начинот на неговото менаџирање е затвореноста за јавноста и медиумите. Тоа за него важеше и како прв даночник и како директор на Прилепскиот комбинат, но и сега како менаџер на „Метрудхем“. Во новата улога Димитриоски се појави само два пати и тоа во медиуми по негов избор, но не и на прес конференција, на која би дал јасни одговори за рестартирањето на Топилницата, потег против кој застана не само велешката туку целата македонска јавност.

Остана неговата изјава дека „Метрудхем“ ќе ги убеди велешани дека ќе ги почитува сите светски стандарди за заштита на животната средина. „Ќе ги убедиме дека нашиот проект ќе го спроведуваме почитувајќи ги сите стандарди не само на Македонија туку и на Европска Унија и на Светската здравствена организација кои предвидуваат кои емисии на сите нивоа можат да се испуштаат во животната средина, а сепак да не го нарушат здравјето на луѓето“, изјави Димитриоски во еден од медиумите, на денот кога во Велес се случуваше масовен протест.

Тој досега не се осмели ниту еднаш сето ова в лице да им го каже на велешани. Тоа не го стори ни вчера, кога наместо тој, прес конференција повторно држеше портпаролот на „Метрудхем“, Александар Билбилов. Тој вчера беше збунет кога новинарите се обидоа да дознаат нешто повеќе за управителот на компанијата, Димитриоски. Од каде тој доаѓа на оваа функција, дали е близок со некоја политичка партија, и што работел претходно?

„Приватниот живот на Димитриоски не сакам да го коментирам, ниту пак имам намера да зборувам за неговите ангажмани пред да дојде во ’Метрудхем’“, гласи одговорот на Билбилов.