17.11.2011, 15:31 Грците на протест против „економската хунта“
Десет илјади полицајци и припадници на специјалните сили го чуваа градот од евентуални насилни немири
Од нашиот дописник
Миркица Поповиќ
Атина - Центарот на Атина повторно заличе на дом на духови. Испразнети улици, затворени метро станици и продавници. Градот се испразни за да отстапи простор на прославата на Политехнио, денот кога воените тенкови на милитарниот режим удриле на студентите од Политехничкиот факултет во Атина со цел да ја сузбијат нивната револуција против воената диктатура во државата. Во текот на претходните три дена стари и млади положуваа по еден цвет во дворот на Политехничкиот факултет во спомен на сите оние кои ја покренале и паднале за револуцијата против хунтата која ја држела Грција под стеги од 1967 до 1974 година, режим кој има фрлено во затвор и погубено илјадници. Вчера на Денот на Политехнио низ критичните точки на градот беа поставени од 7.000 до 10.000 полицајци и припадници на специјалните сили со страв дека овој протест може да се претвори во еден од најопасните протести досега поради незадоволството од политичките турбуленции во Грција.
Оваа година прославата на еден од најважните моменти од грчката историја сама по себе беше историска. Годинешното одбележување на денот сега се случува во услови кога Грција има преодна влада во која учествува за прв пат и ултра-десничарска партија, влада која за некои има тешка задача да го подобри меѓународниот кредибилитет на Грција, а за други е само продолжение на владата на Јоргос Папандреу.
Повеќемина од оние кои излегоа вчера на протест се согласуваат со вториот став. Не гледаат спас во сегашната влада и бараат да му се даде на народот да одлучи за иднината. „Денешното значење на Политехнио за мене е сосема исто со она пред 38 години. Се уште важи паролата „Леб, образование, слобода“. Гледајте кратат плати и пензии, народот наскоро ќе почне да гладува и стравува да не им исклучат струја затоа што немаат да платат, за образованието да не зборувам се уште нема учебници, претходната влада само како да испрати нова смена и да замина малку на одмор, без воопшто да се консултира со народот. Имаме долга борба пред нас“, вели една млада девојка. Според неа младите не гледаат многу иднина во државата, но тоа за неа е поттик да се бори за подобри услови, а не само причина да замине што побрзо. Некои од граѓаните кога ќе им се спомне Политехнио само одмавнуваат со раката во неверување дека протестите нешто би смениле, некои од учесниците не сакаат да дадат изјави велат само дека е очигледно колку е страшна ситуацијата, а други пак отворено кажуваат дека младите треба да направат сопствено Политехнио, сопствена борба против владата за да се изборат за подобра иднина.
|
