15.11.2011, 15:20 ЈСП: Цената на нафтата причина за поскапувањето на автобускиот превоз
Цената на нафтата е сериозен трошок за Јавното сообраќајно претпријатие и во 2011 година очекуваме да достигне околу 33 проценти од вкупните трошоци на ЈСП Скопје. Затоа корекцијата на цената на билетите е неминовна, стои во писмената реакција на ЈСП на денешната изјава на Драги Давчевски, член на Совет на Град Скопје.
- Во изминатиот период, последен пат цената на билетите во ЈСП Скопје е покачена во 2006 година кога цената на нафтата изнесувала околу 50 денари. Од тогаш немаме нагорна промена на цената на билетите иако денес цената на нафтата изнесува 68 денари. Напротив, во изминатиот период цената на билетите неколку пати се намалуваше, стои во реакцијата.
Со предложената промена на цените, тврдат од ЈСП, редовните и лојални клиенти, односно патниците со слободни карти воопшто нема да бидат погодени.
- Цената на претплатните билети останува иста со што нашите редовни секојдневни патници нема да почувствуваат промена во цената. Истовремено, со ваквата програма на цената се обесхрабрува купувањето на билети во возилото кај возачот со што возачот ќе може подобро да ја извршува својата работа, стои во соопштението на ЈСП.
|
