14.11.2011, 10:22 Марио Монти на местото на Берлускони
По оставката на Силвио Берлускони, претседателот на Италија Џорџо Наполитано му даде мандат на поранешниот еврокомесар Марио Монти да ја состави новата италијанска влада.
После долги еднодневни советувања, италијанскиот претседател Џорџо Наполитано одлучи одговорната позиција да му ја додели на Монти, кој пак има задача до денеска вечер да состави влада. Гласањето за новиот владин состав во Сенатот треба да биде во вторник.
Новата влада треба да ги спроведе итните реформи со кои треба да се спречи кризата што ја загрозува целата еврозона. Со предавањето на мандатот на Монти, чија влада главно ќе се состои од технократи, завршува турбулентниот политички викенд во Италија, во кој прво парламентот ги изгласа реформите, а потоа премиерот Берлускони се повлече од функцијата.
Монти е истакнат економист, кој минатата недела беше прогласен за доживотен сенатор на Италија. Тој се очекува денеска да именува 12 министри, а декларативно има поддршка од опозициските партии, од центристите и од партијата на Берлускони.
„Италија мора да биде сила во Европа, а со заеднички напори можеме да ја надминеме кризата“, рече Монти на прес-конференција.
За��ената на владата во Италија се случи за само еден ден иако тој процес обично трае со денови. Овојпат претседателот Наполитано реагираше брзо за да ги спречи понатамошните негативни последици врз берзата.
Монти (68) е професор по економија на универзитетот Бокони во Милано. Тој важи за силен поддржувач на Европската унија. Во периодот од 1994 до 2004 година беше еврокомесар, во почетокот за внатрешна трговија, а потоа и за конкурентност.
Медиумите во Италија го опишуваат како смирен, ладен и прибран политичар, целосно спротивен од Берлускони кого го следеа скандали и гафови во текот на владеењето.
|
