14.11.2011, 11:38 Иванов на меѓународен симпозиум во Париз
Претседателот на Република Македонија Ѓорге Иванов денеска ќе престојува во Париз, како покровител на научниот проект посветен на патеписецот Евлија Челеби, што се одржува во рамките на Алијансата меѓу цивилизациите.
Претседателот Иванов, како што соопшти неговиот кабинет, ќе ја отвори изложбата „Отоманскиот патописец: Евлија Челеби“ на Институтот за Арапски свет. На меѓународниот научен симпозиум „Евлија Челеби, отоманскиот патописец од 17-от век и Европа во негово време“ ќе учествува делегација на МАНУ, предводена од нејзиниот претседател Георги Старделов.
Меѓународниот симпозиум што го организираат Националниот институт за ориентални јазици и цивилизации (ИНАЛКО), Турската национална комисија на УНЕСКО и Центарот за истражување на цивилизациите при Универзитетот Бахчешехир во Истанбул, е еден од трите големи научни симпозиуми со научници од целиот свет што ќе се одржат во Париз, во Скопје и во Истанбул.
Претседателот Иванов ќе биде покровител на проектот и на научниот симпозиум кој во април 2012 година ќе се одржи во Скопје.
Шефот на македонската држава во рамки на посетата на Париз ќе има средба со генералниот директор на УНЕСКО Ирина Бокова.
|
