Поглед

МТВ во став „мирно“

Јасминка Павловска

Можеби не беше како во времето кога улиците беа празни штом Бранка Станковска ќе го започнеше Дневникот на тогашната Телевизија Скопје, но се чини дека Македонската телевизија во неделата, токму во терминот на централниот Дневник ја имаше најголемата гледаност веројатно во последниве десетина години. И тоа повторно со честа на Бранка Станковска и нејзиниот колега од доајенската презентерска генерација, Благоја Крстевски. Сосема извесно поголема беше љубопитноста на гледалиштето како денес изгледа Бранка Станковска, отколку за ребрендирањето на јавниот сервис со ново лого, џамбо спејсшатл екран и студио светнато како за шоу програма на италијанските телевизии на Берлускони.

Свеченоста на мигот на ребрендирањето изгледа ги возбуди до неприродна трема познатите ликови од некои други поранешни телевизии, кои својата професионална среќа ја пронајдоа во МРТВ, па остана чувството дека им е потребна втора шанса за прв впечаток. Збунувачки од гледачки аспект е што повеќето учесници во премиерниот ребрендиран Дневник стоеја како професори по географија пред импресивниот екран со голема веродостојност (ХД) на сликата.

Но сепак, правото на „сеирџиски скептицизам“ на обврзниците за плаќање на радиодифузна такса треба да биде умерено кога започнува некаква нова ера. На Македонската телевизија, Дневникот и сите емисии во неа им е одамна потребно редизајнирање, осовременување, енергија за да се' биде на нивото на еден јавен сервис. Модерното студио, новото лого и дизајн се сосема потребни. Сепак, правото на скептицизам останува отворено, доколку се' остане само на шминка и визуелен редизајн. Заблеснатоста од редизајнот брз�� се троши, а гледаноста сепак зависи од содржините.