„800 револуции во минута“, изложба на „Кооперација“

„800 револуции во минута“ е прва од серијата изложби/ настани која во организација на „Кооперација“ ќе се одржи вечерва во 20 часот на ул. „Коста Шахов“ бр. 6. Изложбата е поместена во простор првенствено наменет за пералница, опфаќајќи ја темата на новите почетоци и развивање на иновативни стратегии и интервенции во специфични услови на збиен простор и временска ограниченост. Насловот е преземен од степенот на центрифуга наведен во прирачникот за машина за перење алишта, а карактеристично за изложбата е што ќе трае само еден ден.

„Кооперација“, која ја сочинуваат Ѓорѓе Јовановиќ, Никола Узуновски, ОПА, Игор Тошевски, Филип Јовановски, е нова иницијатива чија цел е активно дејствување вон инертните институционални рамки, иницијатива која предлага еден поинаков начин на создавање и доживување на современата уметност на територијата на Македонија. (Д.Л.)