Едиторијал

Сите тајни на парното греење

Маја Томиќ

Прекривка од мистериозноста го обви парното греење. З�� малку скопјани завчера ќе останеа со студени радијатори, а се' уште не знаат зошто можеше да дојде до тоа. Се прашуваат што се случува со „Топлификација“, зошто компанијата нема пари и не му платила на „Макпетрол“ за мазут и за гас, и тоа 1,7 милиони евра, ако секој месец плаќаат сметки. Како оние кои се грејат, така и оние кои се откажаа од парното греење. Се чудат зошто дојде до ситуација „Макпетрол“ да се заканува со прекин на испораката на гас за „Топлификација“ и зошто мораше Владата експресно да се вклучи и да ја смири кавгата меѓу компаниите.

Многу прашања, одговорите сите ги нагаѓаат. Дури и новинарите. Тие залудно упорно се обидуваа(т) да добијат дополнителни информации од компаниите, од Владата и од Регулаторната комисија за енергетика која ги дели лиценците за снабдување и испорака со енергенси. Одговорните едноставно не се јавуваа(т) на телефонските повици или се недостапни. Очигледно сите вмешани страни во оваа ситуација со парното греење мислеа дека е доволно да испратат официјалано соопштение од неколку реченици. „Макпетрол“ напиша дека затоа што „Топлификација“ му должи 1,7 милиони евра ќе ја стопира испораката на мазут и гас и нема да одговара за последиците, „Топлификација“ се огласи до Берзата (!?) и објави дека се обидува да најде трајно решение за вршење на регулирани дејности со кое ќе бидат задоволени корисниците, а од Владата соопштија дека е надминат предизвикот меѓу компаниите во врска со снабденоста со парно и дека ќе продолжи греењето.

И толку. Но, тоа е далеку од доволно. Несериозно е до таа мера да се потценуваат граѓаните и да се третираат како некои споредни фактори. Напротив, тие се клучните фактори затоа што се директни корисници на услугите на „Топлификација“ и на „Макпетрол“, во актуелнава ситуација. А, во истиот кош може да се стават и услугите на „Окта“ и на ЕВН. Сите овие компании кои држат монопол на енергетскиот пазар живеат од џебот на граѓаните. Затоа со право треба и мора да бидат информирани за секоја ситуација што ги допира нивните интереси. Значи, не треба секој да ги знае деловните тајни на компаниите. Ама ако „Топлификација“ нема пари за мазут, што значи дека ќе нема парно, не може одговорните да се прават „енглези“ и со едно соопштение од три - четири реченици, од кои никој ништо не може да сфати, да мислат дека ја завршиле работата.

Срамно е што наместо компаниите, новинарите се чувствуваат одговорно и непријатно и ставаат во ситуација да копаат од сите страни дополнителни информации по од некои свои извори и канали за да му го дадат на народот она што го заслужил, точна информација.

Навистина е крајно несериозно, вакви компании кои се значаен составен дел од животот на граѓаните, да немаат нормална комуникација со јавноста и да сметаат дека е доволно да праќаат по медиумите штури инфорамции.

И медиумите и компаниите постојат и работат заради интересите на граѓаните. Како е можно ниту „Топлификација“, ниту „Макпетрол“, ниту „Окта“, иако имаат служби за информирање, да немаат лице за комуникација со медиумите кое ќе информира за битни работи од интерес за корисниците. Дури и ако новинарите успеат да контактираат со службата за информирање, комуникацијата завршува најчесто со зборовите :„испратете меил и ќе Ви одговориме на прашањето“ или (евентуално), „ќе Ви кажам, ама немој да ме цитирате, кажете, дознаваме“. Тука и на тој начин завршува комуникацијата. А, директен телефонски разговор со првите луѓе на енергетските компании, како и од Регулаторна комисија, е рамно на невозможна мисија или на лотарија. Без разлика за каков проблем станува збор.

Не се „Топлификација“, „Макпетрол“, „Окта“, ЕВН и Регулаторната комисија компании лоцирани во некоја друга држава, ниту пак се некои локални фирмички за да се однесуваат така како што тие сакаат. Ако секој граѓанин дава по половина и повеќе од својата плата од својот џеб на сметките на овие компании, навистина е коректно од нивна страна да му дадат информации од негов интерес.