Латас осуден за навреда на Героски

Со одлука на судот, Драган Павловиќ-Латас ќе треба да плати 45.000 денари за навреда кажана во емисијата на Миленко Неделковски

Главниот уредник на весникот „Вечер“, Драган Павловиќ-Латас, е осуден за навреда на уредникот на „Фокус“, Бранко Героски. Судечки совет на Основниот суд Скопје 1 - Скопје вчера донесе првостепена пресуда со која се потврдува дека главниот уредник на весникот „Вечер“ го навредил Героски. Според одлуката на судот, Павловиќ ќе треба да плати 45 дневни глоби, или околу 45.000 денари, а со дополнителна одлука ќе треба да се одреди и висината на штетата која му била нанесена на тужителот. „Не можам да кажам дека сум задоволен со одлуката на судот, бидејќи судијката Сандра Крстиќ одлучи дека јас не сум бил наклеветен. Судот смета дека јас сум тој што треба да ја докажувам клеветата, а не тужениот“, вели заменик-главниот уредник на „Фокус“, Бранко Героски.

Оваа судска постапка беше иницирана со приватна тужба на Героски по настапот на Драган Павловиќ-Латас во емисијата „Миленко Неделковски шоу“, пред повеќе од две години.

Во настапот на емисијата, Павловиќ го валкал името на Героски и тој решил правдата да ја побара на суд. Героски не сака да говори за сето она што било кажано за него, но вели дека главната поента на тужбата била насочена на делот во кој Павловиќ кажал дека тој добил отказ од весникот „Дневник“, а што не соодветствува со реалноста.

Нема дилеми дека со изречената казна ќе биде незадоволен и осудениот Павловиќ, па оттука треба да се очекува негова жалба по изречената првостепена пресуда. (Љ.С.)