Паника кај потрошувачите поради струјата и парното

Нема евтина струја преку недела од 13 до 16 часот, но останува евтината тарифа во ноќните часови по 22 часот и во недела

Соња Маџовска


Пред најголемиот празник Илинден, Регулаторната комисија за енергетика им приреди голем шок на граѓаните. Уште не стивна шокот од зголемувањето на цената на струјата за 10 отсто и парното греење за над 3 проценти, кое важи од 1 август, дојде нов.

Регулаторите донесоа нов тарифен систем за електричната енергија и нов Правилник за корисниците на парното греење.

Без никакво објаснување пред јавноста, Регулаторната комисија за енергетика ги донела овие нови одредби кои создадоа општа паника меѓу населението. Не стивнуваат реакциите, граѓаните само за тоа разговараат, а тие се главна тема и во сите дебати на социјалните мрежи. Веднаш реагираа пензионерите, мајките со мали деца, кои токму во овој период готвеа, ги пуштаа машините за перење, бојлерите, со цел да заштедат и да добијат пониска сметка за електрична енергија.

Со промената во тарифниот систем Регулаторна комисија одлучила дневниот интервал од 13 до 16 часот во кој досега потрошената електрична енергија се плаќаше по ниска тарифа, од 1 август годинава да се фактурира по висока тарифа. ЕВН сега има обврска да го смени софтверот на броилата, тоа ќе трае неколку месеци, а како ќе се менува софтверот, така ќе почне да важи новата поскапа тарифа.

Во моментов, се' уште има евтина струја од 13 до 16 часот, но веќе од понеделник кога екипите на ЕВН ќе излезат на терен тоа може да биде променето, зависно од кој реон ќе се почне со менувањето на софтверите на броилата. Но, за тоа би требало да бидат известени граѓаните.

Инаку, и натаму од 22 часот до 7 наутро ќе се пресметува струјата по евтина тарифа, и во недела, односно почнувајќи од 22 часот во сабота до 7 наутро ��о понеделник. Преку недела евтина струја ќе има само во ноќните часови.

Се шпекулира дека на ваква одлука од регулаторите не се надевале ниту од ЕВН, и дека дури и компанијата била затечена од оваа одлука, иако тоа го барале со години наназад.

Објаснувањето за промената на тарифниот модел е дека нема техничка ниту економска логика во периодот кога оптоварувањето на електроенергетскиот систем во Македонија е најголемо, дополнително да се стимулира потрошувачка, со евтина струја, која дополнително ќе го оптоварува системот и ќе предизвикува зголемени трошоци за увоз на електрична енергија во зимските месеци. Ниската дневна тарифа во периодот од 13 до 16 часот била наследена од тарифните системи кои датираат од 1980-тите години во поранешна СФРЈ, кога имало и технички и економски причини за таков чекор. Во државите од регионот веќе нема ниска тарифа во овој период од поодамна.

Но, без разлика на сето ова, Регулаторната комисија беше должна да излезе во јавноста и отворено да ги соопшти и објасни новите правила и за користење на електричната енергија и за парното греење.

Граѓаните се во шок

„Шок е ова што се случува со струјата и парното. Како ние граѓаните во последно време да сме ставени на некаков тест на издржување. Како јас сега, како мајка на две деца, ќе ја користам евтината струја? Ќе треба да правам ручек, да чистам, да перам и се' друго после 22 часот? Навистина е тоа голем проблем за сите, но особено за семејствата кои имаат деца. Во голема финансиска криза во каква што се наоѓаме во последниве години, уште поскапувања не ни се потребни. И онака сметките се високи и не ги издржува нашиот скромен буџет. Не знам како ќе живееме.“ (Р.Д.)


Не давам пари за нешто што не користам

„Само што сакавме да го исклучиме парното греење. Се договаравме и со соседите тоа да го направиме сите, за да не мора тие да плаќаат дел од нашата сметка. Сметките ни се високи и не можеме да издржиме да ги плаќаме со нашите мали плати. Но, сега, најновата информација која стигна, дека и да го исклучиме парното ќе мораме повторно да го плаќаме, ја доживуваме повеќе како траги-комична. Како може некој мене да ми кажува што да правам и како да ги распределам моите средства? Како може ’Топлификација‘ да ме присилува да давам пари за нешто што не користам, односно да ме уценува?.“ (М.Л.)


Не можат да ме присилат повторно да се приклучам

„Јас сум исклучен пред две години. Не плаќам парно греење, се грејам на струја. Плаќам толку колку што сакам да ми биде топло. Сега дали ќе бидам принуден да се приклучам пак на парно? Како ќе ме натераат? Ќе ме тужат? Во ред, одиме на суд, да видиме кој ќе добие. Мислам дека надвор од здрав памет е да ме принудат да користам услуги за нешто не сакам. Дали тогаш и другите компании ќе ме принудат да користам нивни услуги? Се зборува дека за исклучување од парно ми треба дозвола од другите станари во зградата? За што дозвола? Јас веќе сум исклучен... Треба да им барам дозвола за нешто што веќе сум го направил?“. (Г.М.)