Да се повлече новиот Правилник. Како да се исклучите од „Топлификација“

„Топлификација“ ќе мора да им понуди нови договори на исклучените. Доколку не сакаат да ги потпишат, ќе плаќаат по 10 денари за квадрат фиксно секој месец

Соња Маџовска



Регулаторната комисија за енергетика веднаш да го повлече новиот Правилник за парното греење, бараат потрошувачите и политичките партии, во спротивно тој ќе биде обжален пред Уставен суд.

Со новиот Правилник граѓаните фактички ќе мора да да плаќаат за услуги кои воопшто нема да ги добиваат од „Толификација“, односно и корисниците кои се исклучиле ќе плаќаат дел од предвидената цена за парно греење. Ќе се плаќа по 10 денари по квадратен метар, што значи и оние со најмали станови, на пример, од 50 квадратни метри, ќе треба да издвојат до 500 денари месечно. Според правилникот, оваа обврска нема да важи за оние граѓани кои живеат во згради што се целосно исклучени од системот за греење. Оние што тоа сакаат допрва да го направат ќе можат тоа да го сторат само во периодот надвор од грејната сезона, односно од 30 мај до 30 август.

На граѓаните кои незадоволни, пак, од цените на парно греењето се исклучиле од системот, сега дистрибутерот ќе им понуди нови договори за приклучување. Доколку не сакаат да ги потпишат, ќе ја плаќаат фиксната цена од 10 денари за квадрат секој месец.

„Кога ги носевме подзаконските акти, имавме одредби дека ако некој од потрошувачите во станбените објекти сака да остане исклучен од мрежата и да не користи топлинска енергија, ќе има обврска да го плаќа фиксниот дел од надоместокот. Дозвола за тоа, односно согласност, според новиот Правилник, треба да добие од сите станари и од управителот“, изјави деновиве Димитар Петров, претседател на Регулаторната комисија за енергетика.

Со ова на некој начин се решава клучниот проблем што ја мачеше компанијата, да престане исклучувањето од системот.

На прашањето како ќе ги присилат исклучените корисници на системот повторно да се вклучат, Петров вели дека снабдувачот ќе треба да ги најде сопствениците на исклучените станови преку управителот на зградата.

„Не станува збор дека некого ќе присилиме, тоа е Правилник што се однесува за сите потрошувачи, и на оние што се исклучени. Обврската за приклучување ќе биде на операторот на дистрибутивната мрежа. Ако потрошувачите се организираат и не сакаат да користат топлинска енергија во целиот објект-зграда, останува можноста да останат исклучени“, изјави Петров.

Она што е ново во Правилникот, а е обврска за дистрибутерот е тоа што тој ќе мора да вгради распределители со кои на некој начин ќе се регулира потрошувачката на топлинска енергија, но, од друга страна, инсталацијата на распределителите и на вентилите ќе значи зголемување на цената на парно греење. Според првичните пресметки, ако се земе просек од 250 евра за стан, цената на парното ќе се зголемува во просек по 5 отсто годишно во наредните пет години, по оваа основа.

Како да се исклучите од „Топлификација“