Поглед

Холивудски манири

Слободанка Јовановска

Во светот на гламурот е вообичаено ѕвездите да доаѓаат последни, но тоа правило од минатата недела не важи, бидејќи нашиот премиер Никола Груевски успеал да дојде подоцна и од мегаѕвездата Анџелина Џоли.

Иако во политиката за такво однесување не би требало да има место, бидејќи постои нешто што се вика служба за протокол, од поодамна благодарение повторно на нашиот премиер, и тоа правило не важи.

Има ли премиерот Груевски одговорни околу него што ќе му го активираат будилникот што го доби од Јани Макрадули или и натаму ќе си го менаџира сам денот сериозно создавајќи си шанси да влезе во историјата на Македонија по неспособноста да дојде навреме и на најважните средби?

Откако и' задоцни на канцеларката на Германија, Ангела Меркел, каде што точноста се подразбира и е национална доблест, премиерот му задоцни речиси половина час и на посредникот Метју Нимиц, кој од САД дојде во Скопје, а тој не успеа во тоа дома.

По сите славни доцнења изминатите години, едно од остварувањата при следниот отчет на премиерот затоа треба да биде - која е најбитната светска личност што мораше да го чека него, најпрезафатениот лидер на една од најмалите држави во Европа, па и пошироко? И, има ли графа во Гинис за вакви рекорди за да видиме некаква корист од премиерските навики кои очигледно се посилни и од него.

За волја на вистината, имаше средби на кои тој, сепак, стигна навреме, а почестен со таква ексклузивност беше бившиот грчки премиер Јоргос Папандреу. Веројатно желбата да не се видат беше толку силна што и за едниот и за другиот недоаѓањето навреме беше политички луксуз.