Инсајдер

Кој да го замени Ѕинго?

Четири имиња се вртат како можни наследници на Љубисав Иванов во СПМ, но ништо не е сигурно додека тој не се изјасни дали заминува од кормилото

Александра М.Митевска

Љубисав Иванов-Ѕинго останува на чело на Социјалистичката партија најрано до следната година напролет, кога треба да се одржи партискиот конгрес за избор на ново раководство. Иванов неодамна си поднесе оставка во парламентот по 22 години пратенички стаж во седум мандати, но не ги соопшти точните причини за овој потег.

Не соопшти ниту дали планира да замине и од кормилото на СПМ, што го презеде пред 16 години. Во тој период македонските социјалисти доживеаја големи кадровски осцилации, но и екстремна промена на курсот, ако се има предвид дека од партија позиционирана во крајната левица, пред десетина години, влегоа во коалиција со десничарската ВМРО-ДПМНЕ, претходно напуштајќи го партнерството со социјалдемократите.

Во парламентот е извесно дека местото на Иванов ќе го заземе Марија Рашковска од ВМРО-ДПМНЕ. Но, неизвесно е кој би го заменил Ѕинго во партијата, за каде што може да се каже дека тој изгради култ на личноста.

Портпаролот на СПМ, пратеникот Малиша Станковиќ, вели дека Иванов останува на лидерската функција. На прашањето кога на Иванов му истекува овој лидерски мандат, Станковиќ појасни дека тоа официјално ќе се случи напролет, кога партијата ќе одржи конгрес, што треба да го закаже Републичкиот одбор. Поточно, мандатот на Иванов веќе неколку месеци е истечен, но со одлука на партиските органи, бил продолжен за уште една година, односно до следниот конгрес.

„Не можам да прејудицирам што ќе биде пред конгресот. Дали Иванов повторно ќе биде кандидат за лидер или кој се' би се кандидирал за претседателската позиција, главно, зависи од тоа како ќе се изјаснат општинските организации“, вели Станковиќ, појаснувајќи дека многу работи ќе бидат појасни до крајот на оваа година, кога ќе почне процедурата за конгресот.

Во првата декада од плурализмот, СПМ беше силна партија, со историја на успешни самостојни изборни настапи, со голем број звучни имиња во нејзиниот состав и со многу кадри во извршната власт. Но, со текот на годините голем дел од личностите кои беа заштитен знак на социјалистичката идеја во земјава се оддалечуваа од партијата. Меѓу нив би можеле да се споменат Златка Поповска, Хари Костов, Илија Филипче, Владимир Наумовски, Мирко Трифуновски, Миле Димитровски, Љубе Трпеновски, Зоран Витанов, Благоја Филиповски...

Во последните години политичкото влијание на Социјалистичката партија, главно, се поврзува со моќта на телевизија Сител. Тоа можеби е и една од причините зошто социјалистите се' уште имаат најсолидни позиции во коалицијата предводена од ВМРО-ДПМНЕ, во споредба со другите помали партии.

СПМ, во изминатите шест години, го контролира Министерството за земјоделство, прво преку Александар Спасеновски, кој замина за амбасадор, а сега преку Љупчо Димовски. Во парламентот, пак, партијата на Иванов до скоро имаше тројца пратеници, а сега остана со Малиша Станковиќ и Владанка Авировиќ.

За тројцата актуелни носители на функции од редовите на социјалистите, Димовски, Станковиќ и Авировиќ, кои имаат и високи партиски функции се шпекулира дека се потенцијални кандидати за лидерската позиција ако Иванов го напушти кормилото. Се споменува и Јован Лазаров, кој и натаму фигурира како потпретседател на СПМ, иако малку е присутен на јавна сцена. Упатените во приликите во СПМ, пак, сметаат дека Ѕинго ќе одлучи кој ќе биде третиот лидер на македонските социјалисти.