ЛП: Казната за клевета да биде 2.700 евра

Либералната партија бара пропишаната максимална казна од 27.000 евра за новинарите и медиумите за клевета и навреда да се скрати за една нула и да не надминува 2.700 евра. Претседателот на партијата Ивон Величковски таквото размислување го поткрепи споредувајќи го највисокото можно отштетно побарување со оние кои се досудени во останатите земји.

„Ако во БиХ највисоко досудено отштетно побарување е до 5.000 евра, ако во Франција тоа практично е 1 евро, а во Италија од 51 до 2.852 евра, во Македонија тоа не може да биде 27.000 евра! Најголемиот број медиуми во земјава што еднаш или два пати ќе бидат казнети со 27.000 евра - нема да имаат време за трета казна, зашто нема да постојат“, вели Величковски.

Според него, ако пред декриминализацијата на клеветата и навредата, автоцензурата беше закана за слободата на домашното новинарство и медиумите, сега заканата доаѓа од каскадната цензура: до 7,5 отсто автоцензура на новинарот, до 37 отсто цензура од уредникот и 55,5 отсто цензура на сопственикот.