Премиерска дилема: дали Тодоров ја јакне или ја ослабува ВМРО-ДПМНЕ

Колку настаните во здравството можат да му ја разнишаат фотелјата на министерот, кој е истовремено и шеф на изборниот штаб на владејачката партија

Наум Котевски


Кога Извршниот комитет на ВМРО-ДПМНЕ во јуни годинава го назначи министерот за здравство Никола Тодоров, за шеф на Републичкиот изборен штаб на владејачката партија за наредните локални избори, сигурно не предвидел дека претпоставената добитна комбинација наеднаш ќе се претвори во ризичен потег. Дека стратегијата на амбициозниот министер, кој стана една од водечките фигури во партијата, во врска со штрајкот на лекарите и здравствените работници може негативно да се одрази врз рејтингот на партијата, и тоа во најлош можен период, на само четири месеци пред изборите.

Сега веќе не е во прашање само времето, односно тоа дали првиот правник на позицијата министер за здравство ќе може да стигне успешно да ги изврши двете функции - државната и партиската, туку дали неговата нарушена популарност кај признатите лекари и универзитетски професори, кои имаат влијание врз општеството, ќе влијае на личниот и, воопшто, на партискиот предизвик токму тој да управува со општинските комитети на ВМРО-ДПМНЕ.

Ако се има предвид дека локалните избори по многу параметри се потешка политичка операција отколку парламентарни избори, можно ли е сега премиерот и претседател на ВМРО-ДПМНЕ, Никола Груевски, да се поколеба што му ја довери најважната функција токму на Тодоров, откако Мартин Протоѓер од местото генерален секретар на партијата ја извршуваше успешно три пати по ред.

Професорот по политички науки Здравко Савески, смета дека недоразбирањата меѓу Тодоров (за кого се' погласно се шпекулира дека е идниот министер за внатрешни работи) и лекарите, може да се одрази негативно врз популарноста на партијата.

„Јас немам видено дека премиерот Никола Груевски јавно даде поддршка за својот министер. Неформална има, но не и јавна. Тоа секако може да ја ослабе неговата позиција во партиските структури и да ја разниша исклучително сериозната функција шеф на Републичкиот штаб на ВМРО-ДПМНЕ“, вели Савески.

Изборите се приближуваат, а според Савески, работите зависат од тоа како натаму ќе се одвива штрајкот.

„Тој може да трае до недоглед. Важно е како и кога ќе заврши проблемот. Според мене најдобро за партијата е да го замени Тодоров. Тој да остане член на Изборниот штаб, но да не биде шеф“.

Неодамна во еден свој текст посветен на потезите на првиот човек во здравството, магистерот по Уставно право Иван Стефановски, потсети дека „почитуваниот министер пред неколку месеци, од страна на неговиот партиски шеф беше именуван за шеф на Републичкиот изборен штаб на ВМРО-ДПМНЕ“.

„Од тој момент па натаму, во министерот се акумулирани две важни функции. Од ова произлегува дека на премиерот или не му се важни локалните избори, или не му е важно здравството во Македонија“, напиша Стефановски.

Владимир Божиновски од Институтот за политички истражувања, пак, вели дека смена на Тодоров од позицијата шеф на изборниот штаб како и од позицијата министер за здравство ќе донесе најголема штета токму за ВМРО-ДПМНЕ.

„Не значи дека секогаш е добро кога нема проблеми. Напротив подобро е да постојат проблеми, затоа што реформите по дефиниција нив ги носат. Треба да се види дали е тој штрајк оправдан или не е. Најпрвин беше спорна платата по учинок, на која потоа се додаде елементот зголемување на плати, кој логично е примамлив за секого“, вели Божиновски.

Тодоров пред да биде назначен за министер за здравство беше министер за образование. Неговите реформи во овој ресор многу реномирани професори ги сфатија како директен упад врз автономијата на универзитетите и обид за мешање во внатрешната организација на најстариот државен универзитет. Тие протестираа, но бргу замолчеа. Сега Тодоров има малку потешка задача да ги заузда „дивите лекари“.

„Лично мислам дека проблемот ќе резултира со договор. И министерот е во право што бара плата по учинок, а и лекарите се во право што бараат тоа на некој начин да се модифицира“, вели Божиновски.