Половина Влада и бизнис-елита донираа за црквата пред АРМ

Македонската православна црква организираше донаторска конференција за изградба на храмот „Свети Константин и Елена“

Деспина Трајковска

Половина Влада на чело со премиерот Никола Груевски, г.г. Стефан, претставници на Синодот на МПЦ, директори на јавни претпријатија, многу бизнисмени, парламентарци и други личности од општествениот живот вчера се собраа да донираат пари за изградба на црквата „Свети Константин и Елена“, што неодамна почна да се гради пред Домот на АРМ во Скопје. Кој колку донираше, дали даде лични средства или пари од буџетот на соодветната институција - остана тајна. Конференцијата, всушност, беше организиран ручек за присутните со тајно донирање на средствата во меѓувреме. Средбата траеше речиси три часа, при што г.г. Стефан и премиерот Груевски се обратија пред присутните, образложувајќи ја потребата од доброволен прилог за изградба на храмот.

„Ајде заедно да го испочитуваме аманетот на старите скопјани, да ја исправиме историската неправда. Да помогнеме да го возобновиме храмот, кој иако мал по големина, многумина го посетувале. Верувам дека тој ќе биде храм, според своето архитектонско решение ќе претставува храм за пример на современата градба за сите храмови. Да помогнеме тој да биде украс на Скопје, уште една духовна тврдина на македонската вистина, да помогнеме да изградиме уште еден духовен покрив за верниците во Скопје. Кој за Бога дава, тој вечен споменик си гради“, им порача г.г. Стефан на присутните и ги повика секој во рамки на своите можности финансиски да помогне да се изгради „Свети Константин и Елена“.

Долгонајавуваната обнова на храмот започна неодамна. Иако првично беше планирано црквата да се гради на плоштадот „Македонија“, сепак, објектот ќе никне пред Домот на АРМ. Согласно со урбанистичкиот план, ќе може да достигне висина до 30 метри, а камбанаријата дури и до 50 метри.

„Да бидеме сплотени, да ги чуваме, негуваме и градиме храмовите. Црквата отсекогаш била душата на нашиот народ, таа имала значајна улога во историјата како стожер на македонскиот народ. И сега ве повикувам да бидеме солидарни заеднички да го изградиме храмот, оти солидарноста и црквата се алка која не' поврзува“, порача премиерот Груевски.

За потребите на изградба на храмот, инвеститорот МПЦ формираше и фондација „Св. цар Константин“. Црквата ја гради скопски „Бетон“. Храмот се возобновува во пресрет на 2013 година, кога христијанските народи ќе одбележат 1.700 години од Миланскиот едикт - указ за слобода и рамноправност на христијанството со другите религии во Римската Империја.