24.10.2012, 09:57 Шахтјор му зеде мерка на Челзи
Со триумфот над „сините“ од 2:1, украинскиот тим го презеде лидерското место во групата Е
Европскиот првак Челзи налета на вистински ѕид во Лигата на шампионите. „Сините“ од Лондон дојдоа во Доњецк по победа, но си заминаа надиграни и поразени од украинскиот првак Шахтјор. За тоа колку лошо играше европскиот шампион говори и статистиката која вели дека да не беше Чех на голот, ќе си заминеа со поубедлив пораз. Во првите 45 минути Шахтјор имаше неверојатни 14 удари кон голот на Чех, додека Челзи во тој период упати само три. Поседот на топката исто така беше на страната на Украинците.
„Натпреварот се од��иваше според нашите очекувања. Можеби ова беше една од нашите најдобри партии во последно време. Победата покажува дека сме на добра пат, играчите созреваат и полека станува сериозен тим. Фактот дека екипата на Челзи е уште посилна од минатата година кога ја освои титулата, нашата победа ја прави позначајна. Уверен сум дека можевме да дојдеме до поубедлив триумф, но Чех не' спречи во тоа“, изјави по средбата тренерот на украинскиот тим, Мирчеа Луческу.
Првиот гол за Шахтјор го постигна бразилскиот интернационалец Алекс Тешеира, кој ја искористи шансата и го погоди долниот агол на Чех. „Сините“ хендикепирани го продолжија натпреварот бидејќи се повреди искусниот Френк Лампард, а на негово место влезе Еден Хазард.
Во почетокот на второто полувреме Фернандињо ја зголеми агонијата на англискиот тим. Дури во завршната четвртина од натпреварот Челзи се разигра го зголеми бројот на удари кон противничкиот гол, но и поседот на топката, а сето тоа резултираше со погодок на бразилскиот вундеркид Оскар за намалување на водството. Сепак, немаше време Челзи да го израмни резултатот, па бодовите останаа во Доњецк, па така му го препушти првото место во групата на Шахтјор.
Италијанскиот првак Јувентус неочекувано одигра нерешено со данскиот првак Нордсјиланд (1:1). Иако важеше за фаворит екипата од Торино едвај спаси бод од ова гостување бидејќи имаше негатива од еден гол, а благодарение на нововлезениот играч во второто полувреме Мирко Вучиниќ. За „Старата дама“ ова е трето реми во третиот меч во шампионската лига и мора да почне да победува во наредните три кола доколку сака да презими во европската елита. Нордсјиланд го освои првиот поен во Лигата на шампионите.
На мечот од третото коло на голот на Јувентус по повредата се врати еден од најдобрите голмани во светот, Џанлуици Буфон, кој по мечот беше видливо незадоволен.
„Ме лутат две работи. Резултатот и начинот на којшто примивме гол. Слободниот удар на Бекман беше одличен и тука не можев ништо да направам, но не смеевме да си дозволиме прекршок во казнетиот простор. Ова беше единствениот начин преку кој можеа да постигнат гол. Не се сеќавам кога еден ваков момент на крајот бил пресуден за лошиот резултат“, вели разочарано Буфон.
Манчестер јунајтед добро се испоти за да го совлада португалскиот претставник Брага. „Црвените ѓаволи“ имаа негатива од два гола, меѓутоа ја поправија својата игра и ги обезбедија трите бода на крајот. Алан постигна два гола за Брага на „Олд трафорд“, а потоа Јунајтед целосно ја презеде иницијативата и стигна до победа 3:2.
Мексиканскиот напаѓач Хавиер Хернандез се покажа таличен за Јунајтед бидејќи го постигна првиот и победничкиот гол, додека вториот погодок беше дело на одбранбениот фудбалер Џони Еванс.
„Нашите напаѓачи завршија одлична работа. Во одредени периоди игравме извонредно. Направивме многу шанси. Сепак мора да признам дека малку ме загрижува фактот што во последно време често први примаме гол“, смета Алекс Фергусон.
По три кола Јунајтед има 100-процентен ефект во групата Х, додека Брага е трета со три поени.
ЈУВЕ ИЗВЛЕЧЕ РЕМИ ВО ДАНСКА
Резултати од третото коло, група Е: Нордсјиланд - Јувентус 1:1, Шахтјор - Челзи 2:1. Табела: Шахтјор 7, Челзи 4, Јувентус 3, Нордсјиланд 1. Идно коло (7 ноември): Јувентус - Нордсјиланд, Челзи - Шахтјор.
Група Ф: БАТЕ Борисов - Валенсија 0:3, Лил - Баерн М. 0:1. Табела: Валенсија 6, БАТЕ Борисов 6, Баерн Минхен 6, Лил 0. Идно коло (7 ноември): Валенсија - БАТЕ Борисов, Баерн М. - Лил.
Група Г: Спртак Москва - Бенфика 2:1, Барселона - Селтик 2:1. Табела: Барселона 9, Селтик 4, Спартак (М) 3, Бенфика 1. Идно коло (7 номеври): Бенфика - Спартак (М), Селтик - Барселона.
Група Х: Галатасарај - Клуж 1:1, Манчестер јунајтед - Брага 3:2. Табела: Манчестер Ј. 9, Клуж 4, Брага 3, Галатасарај 1. Идно коло (7 номеври): Клуж - Галатасарај, Брага - Манчестер Ј.
|
