25.10.2012, 10:22 Германска енигма за „кралевите“
Иако Роналдо го постигна својот прв клупски гол на германска почва, Реал Мадрид загуби од Борусија во Дортмунд со 2:1 во ЛШ
Унгарскиот судија Виктор Касаи уште еднаш беше малерозен за Реал Мадрид, а Германија остана „проколната земја“ за „кралевите“. Претрпеа уште еден пораз, овоја пат со 2:1, и тоа во меч во кој Борусија Дортмунд одигра подобро пред се' во второто полувреме, кога нејзините играчи беа доминантни на теренот и создадоа повеќе шанси за гол.
Средбата почна со рамноправна игра и со недоволно сериозни шанси за реализација. Првите закани беа од страна на гостинскиот состав, но шутевите завршуваа или покрај голот на Вајденфелер или над голот. Првата посериозна шанса беше на Озил, но тој се посрамоти откако не успеа да ја погоди топката.
Затоа, пак, на неколку минути пред првиот погодок Себастијан Кел му овозможи на Касилјас да потврди за каква класа голман се работи. Откако доби топка на дваесетина метри без многу размислување биеше под пречката. Касилјас успеа со крајни напори да ја избие над голот така што го спаси својот тим.
Сепак, не успеа да го стори тоа и во 36. минута, кога Левандовски ја казни грешката на Пепе. Португалецот место до својот соиграч ја додаде топката до Кел, а тој веднаш ја упати во празно кон репрезентативецот на Полска. Левандовски им избега на своите чувари така што немаше никакви проблеми за да го совлада Касиљас и да донесе предност од 1:0.
Сепак, предноста не траеше долго. Радоста на стадионот во Дортмунд беше прекратена само две минути подоцна кога Роналдо остана сам по левата страна. Одбранбените играчи на Борусија задоцнија, а Вајденфелер непотребно се обиде да истрча така што на Роналдо не му остана ништо освен да го лобува голманот на противникот и со тоа да го постигне својот петти гол сезонава во ЛШ.
На стартот на вториот дел се виде еден сосема помотивиран состав на Борусија и далеку посилна желба за да се постигне втор гол. Беше направена вистинска опсада пред голот на Касиљас и во само две минути имаше неколку шанси во серија, но ниту една не беше реализирана бидејќи одбраната на Реал беше на ниво.
Затоа во 64. минута Шмелцер одново донесе водство за Борусија. Откако Касиљас успеа да ја избие топката таа не беше смирена од никого. Шмелцер натрча и се намести добро така што биеше на вистинско место и донесе 2:1 за домашните.
Овој гол ја отвори играта на Реал, но шансите не беа доволно добро организирани за да се дојде и до погодок. На тој начин Борусија дојде до триумф со кој се најде на врвот во групата "Д".
По само 20 минути игра Жозе Мурињо мораше да ја направи првата измена, а таа беше принудна бидејќи Сами Кедира ја обнови повредата на бутниот мускул на левата нога. Поради тоа Мурињо мораше да ја смени и конценпцијата, па на местото на Кедира во игра во внесе Модриќ.
Сити тргна одлично на средбата во Амстердам бидејќи после 22 минути игра имаше предност од 1:0 со голот на Насри. Со ова беше оправдана улогата на фаворит и се' одеше според планот за шампионот на Англија. Работите функционираа на ниво до крајот на првиот дел од мечот кога Де Јонг успеа да го совлада Харт и на одмор да ги однесе екипите со нерешени 1:1.
Она што се случуваше на стартот од вториот дел беше навистина неверојатно бидејќи Ајакс тргна како фурија, а Манчестер Сити немаше одбрана. Прво Мојсандер во 57. минута, а потоа и Ериксен 11 минути подоцна го пробиваа штитот на гостите и воедно го матираа голманот на шампионот на Англија. Ајакс водеше со 3:1 на 22 минути пред крај така што веќе беше јасно дека Манчестер Сити и после третото коло останува без победа.
"Росонерите" и понатаму се во голема криза, а поразот од Малага само потврдува дека ништо не оди како што планираат во тимот. Жоакин беше егзекуторот кој дефинитивно само повеќе му ја влошува ситуацијата на Алегри кој денеска ќе биде пред свршен чин и нема друг избор освен да поднесе оставка.
Доколку Жоакин го реализираше и пеналот во првиот дел победникот ќе беше решен далеку порано, но тој не успеа да погоди од белата точка.
"Топчиите" забележаа уште еден пораз во серија, па после загубениот дуел против Норвич сега падна и против Шалке 04. Тимот од Гелзенк��рхен едноставно беше на висина на задажата и го прегази домаќинот. Холанѓаните Хунтелар и Афелај беше одлични кога беше најпотребно и практично тие сами го решија домаќинот и донесоа три многу значајни бода за Шалке 04.
МАЛАГА ГО КУТНА И МИЛАН
Група А, трето коло: Порто - Динамо Киев 3:2, Динамо Загреб - Пари Сен Жермен 0:2. Табела: Порто 9, ПСЖ 6, Динамо (К) 3, Динамо (З) 0. Следно коло (6 ноември): Динамо (К) - Порто, ПСЖ - Динамо (З).
Група Б, трето коло: Арсенал - Шалке 0:2, Монпелје - Олимпијакос 1:2. Табела: Шалке 7, Арсенал 6, Олимпијакос 3, Монпелје 1. Следно коло (6 ноември): Шалке - Арсенал, Олимпијакос - Монпелје.
Група Ц, трето коло: Зенит - Андерлехт 1:0, Малага - Милан 1:0. Табела: Малага 9, Милан 4, Зенит 3, Андерлехт 1. Следно коло (6 ноември): Андерлехт - Зенит, Милан - Малага.
Група Д, трето коло: Борусија Дортмунд - Реал Мадрид 2:1, Ајакс - Манчестер Сити 3:1. Табела: Борусија (Д) 7, Реал 6, Ајакс 3, Манчестер С. 1. Следно коло (6 ноември): Реал - Борусија, Манчестер С. - Ајакс.
|
