Фармацевт со плата од астрономски 63 илјади евра

Веледрогериите биле најплатен бизнис - УЈП ги објави екстра-приходите и највисоките плати за минатата година

Александрија Стевковска

Во јавноста како бомба одекна информацијата дека на контото на еден скопјанец лани секој месец легнувале по неверојатни 63 илјади евра плата. Сега сите се прашуваат кој е тој среќник. Речиси преполовена плата од оваа или 34 илјади евра зел, исто така, менаџер од земјава, а трет на списокот е директор на кој секој месец му се кеширале по 31 илјада евра.

Астрономските суми плати биле исплаќани во секторот здравствени услуги и фармацевтска индустрија, по што следуваат телекомуникациите и банкарското работење. Интересен е податокот што покажува дека некои граѓани, дополнително од работен однос, остваруваат повисоки приходи отколку нивната плата, кои достигнуваат и до 1,3 милиони евра.

Второто највисоко дополнително примање се движи околу 1 милион евра, а третото дополнително примање, пак, достигнува 818 илјади евра.

Милионер со заработени 1,6 милиони евра капитална добивка на Берза е скопјанецот кој за лани пријавил највисок годишен бруто-приход. Ова милионче и 600 илјади евра, според Управата за јавни приходи, е негов единствен приход, односно тој освен што играл на Берза, не пријавил дека зел и плата, бидејќи не се појавува кај ниту еден исплатувач на плата, ниту, пак, како самовработен. Оваа сума покажува дека кризата лани ја издишала берзата, бидејќи заработената сума од тргување е светлосни години оддалечена од 15 милиони евра што ги пријавил скопјанец лани како екстра-заработка во 2008 година. Вториот на листата најбогати Македонци лани ќарил 1,4 милиони евра, додека треторагнираниот стекнал „скромни“, 1,3 милиони евра. Сите тројца се од Скопје и освен информацијата дека првиот на листата ги стекнал парите на Берза, за другите двајца не се обелоденуваат никакви дополнителни информации.

На листата на најголема добивка од дивиденда, исто така, е лице од Скопје со приход од 1,1 милион евра. Најмногу пари од кирија си стокмил скопјанец, кој од оваа дејност лани зел и пријавил неверојатни 323 илјади евра. Како доходовна дејност во Македонија во 2009 година биле и авторските права и правото на индустриска сопственост со оглед на тоа дека по оваа основа, скопјанец остварил бруто-приход од 1,3 милиони евра „Иако според определени истражувања македонските граѓани се едни од најголемите љубители на игрите на среќа и наградни игри, според УЈП мал е процентот на граѓаните што ги пријавуваат овие приходи, односно реално ги искажуваат во даночните пријави. Потврда за ова е струмичанец, најсреќниот добитник во 2009 година, кој од учеството во овие игри остварил 214 илјади евра и не ги пријавил во УЈП“, објави вчера директорот на УЈП, Горан Трајковски. Според него, секоја добивка од игра на среќа над 10.000 денари се оданочува.

Кој вели дека и во пензионерските денови не може да се живее убаво. Пензионер од Скопје за остварен дополнителен приход пријавил фантастични милион евра.

УЈП, како што информира Трајковски, направила контрола и на продажбата на скапи автомобили. Опфатени се 12 автокуќи, при што предмет на контрола биле автомобили со пазарна вредност од над 20.000 евра, при што е констатирано само по основа на ДДВ затајување од 169 илјади евра, по основа на данок на добивка 47 илјади евра и персоналец 5 илјади евра. Од оваа контрола покажува како автоиндустријата се инволвира и во секторот за градежништво, преку компензации.

УЈП, исто така, ги исконтролирала и пловните објекти во Македонија. Од првичните анализи, како што рече Трајковски, индикативно е дека има нереални и ниски вредности за пловните објекти. „За да биде парадоксот уште поголем, вели Трајковски, на некој пловен објект даночна основица му е декларирана 10.000 евра, а е осигуран во некоја осигурителна компанија на 40 или 50 илјади евра. Злоупотребите, според првиот даночник, се однесуваат на тоа што пловните објекти ги водат сопствениците како основни средства на своите компании, на кои дејноста не е поврзана со пловни објекти. УЈП објави дека наплатила данок во висина од 211 илјади евра од тројца функционери, кои самите не пријавиле приходи, а постапките станале правосилни според Законот за спречување корупција“.

До законски утврдениот рок пријава доставиле 149.464 граѓани и дополнително уште 44.225 граѓани. Против оние што не доставиле годишна даночна пријава, како што рече Трајковски, ќе биде поднесена даночна пријава, а од фактите што ќе бидат утврдени во постапката некои ќе поминат само со опомена, а против други ќе биде изречена законски утврдената глоба од 500 до 1.000 евра. (А.С.)