Регистрирањето возила поевтини 5 отсто, а не 30

Владата не ги оствари најавите дека ќе го намали осигурувањето моторни возила

Александар Пешев

Вкупниот трошок за регистрација на моторни возила се намали за приближно 5 отсто во согласност со последната одлука на Владата за намалување на надоместот за користење јавни патишта. Ова намалување се' уште не ги задоволува амбициите на Владата дека вкупниот трошок за осигурување на моторни возила ќе се намали за 30 отсто.

Неделава Владата го намали трошокот за патарините и надоместокот за јавни патишта. Овие мерки беа дел од активностите за ублажување на ценовниот шок предизвикан од растечките цени на нафтата. Ваквите попусти не би требало да предизвикаат големи загуби, имајќи го предвид фактот дека растечката цена на бензинот влева повеќе пари во Буџетот преку данокот на додадена вредност.

Од осигурителните компании објаснуваат дека надоместокот за користење јавни патишта не е дел од задолжителното осигурување на моторното возило, туку дека таа такса се уплаќа преку уплатница по техничкиот преглед на возилото. Надоместокот за користење јавни патишта е само дел од вкупниот трошок кој возачот го плаќа при регистрацијата на моторното возило. Останатите трошоци се такса за екологија, надомест кој се плаќа за Буџетот, такса за Црвен крст, такса за советот за безбедност, такса за административни трошоци, комунална такса и слично.

Од станиците за технички преглед информираат дека техничкиот преглед на моторно возило со сите такси чини од 4.000 до 5.000 денари за патничко возило. За регистрација на патнички автомобил од 1.390 кубика и 59 киловати, вкупниот трошок за технички преглед изнесува 4.682 денари. Во овој трошок е вклучена таксата за користење јавни патишта која пред намалувањето беше 2.180 денари. Со намалувањето на оваа такса за 30 отсто, трошокот за користење на јавните патишта за патнички возила изнесува 1.530 денари или за 650 денари поевтино. Значи, за регистрација на моторно возило од 1.390 кубика и 59 киловати, трошокот за регистрација е намален од 4.682 на 4.032 денари. На оваа сума се додаваат и 7.768 денари за задолжително осигурување. Односно, за регистрација на ова возило на возачот му беа потребни 12.450 денари. Со намалувањето на таксата за јавни патишта, возачот треба да плати 11.800 денари што е за 5,2 отсто поевтино од претходно.

Со одлуката за намалување на оваа такса, Владата засега не ги оствари најавите дека ќе го намали вкупниот трошок за осигурување моторни возила за 30 отсто. Пред речиси еден месец, државниот врв достави предлог до Националното биро за осигурување за намалување на трошокот на задолжителното осигурување. Министерството за финансии тогаш изрази надеж дека со евентуалното усвојување на овој предлог, трошоците за регистрација на моторните возила би се намалиле.

„Владата донесе одлука во која се бара од Комисијата да ја намали премијата за автоосигурување за 30 отсто во рок од неколку месеци. Се очекува поголем број од оние граѓани што ги немаат регистрирано своите возила по оваа одлука да го направат тоа“, рече портпаролот на Министерството за финансии Мартин Мартиновски по објавувањето на предлогот на Владата пред еден месец.

Вчера од Министерството потврдија дека предлогот не е повлечен и дека се очекува во рок од неколку месеци вкупниот трошок за регистрација на моторни возила да се намали за дополнителни триесет отсто преку намалување на трошокот за задолжително осигурување.

Дел од возачите не се во целост задоволни од последните намалувања.

„Мислев дека целиот трошок за регистрација се намалил за триесет отсто, а сега испадна дека само дел од трошокот е намален. Се надевам дека предлогот на Владата ќе се усвои и дека задолжителното осигурување ќе поевтини со што нема да мора да се плаќа толку висок надомест за регистрација“, вели скопски возач.

Во земјите од регионот трошокот за регистрација на моторни возила е значително намален, посебно во земјите-членки на ЕУ каде што веќе влегле европските фондови. Во Бугарија за задолжителното осигурување на возилото од 1.390 кубика и 59 киловати се плаќа околу 75 евра, со тоа што не се плаќа дополнително за зелен картон. Задолжителното осигурување на истото возило во земјава е 126 евра со дополнителен трошок од најмалку 40 евра ако се вози надвор од Македонија.