Кадровска политика на удар

Место евроинтеграција, Теута Арифи спроведува албанизација, се жалат од СЕП

Слободанка Јовановска


Министерството за евроинтеграција станува министерство за албанизација, реагираат вработени со Секретаријатот за европски прашања, според кои структурата на вработените во оваа институција забрзано се менува, а стручноста нема никаква улога. За разлика, на пример, од Министерството за надворешни работи, каде што, и покрај напливот на партиски кадри, старите дипломати останаа, во СЕП од смена до смена речиси комплетно се менува структурата на вработените.

„Не разликува компјутер од машина за перење, а е донесен како кадар за информативна технологија“, го коментираат од СЕП-ангажманот на еден од новопримените Албанци. Секретаријатот досега исклучиво беше управуван од македонски министри, а сега првпат со доаѓањето на Теута Арифи вработените се соочуваат со нов бран новопримени – овој пат рамковни. Според груби процени, пред доаѓањето на Арифи во СЕП имало околу 4 отсто албански кадри, а сега нивниот број достигнал 29 отсто, што е над рамковните рамки, а сепак помалку од Министерството за труд и социјала каде што, како што се тврди неофицијално, процентот на албанските кадри е околу 50 отсто.

„Зборуваат само за таму каде што се помалку од предвидениот процент, а не ги споменуваат министерствата каде што се многу повеќе“, коментираат од СЕП, со оцена дека ваквиот тренд им пречи во работата и ја парализира институцијата. Имено, за разлика од МНР, на СЕП му се случуваше во континуитет нападна партизација, па вмровизација, а сега албанизација, па според упатени извори моментално прашање е дали има десетина кадри од оние што со силни европски пари ги обучуваше Радмила Шеќеринска.

Испаѓа дека СЕП на секоја смена на министерот се растура па одново се создава, а не се гледа дека некој реагира на тоа, туку напротив, се прекрива. Покрај тоа, дискутабилни се и бројките што се пласираат официјално за вработените (според новиот предлог-буџет и лани и сега се 57 лица), кога во претходниот мандат на Васко Наумовски биле деведесетина, а во времето на Радмила Шеќеринска околу шеесет.

Иако министерката Арифи е прилично активна и сеприсутна во јавноста, во СЕП ја проблематизираат нејзината мисија, тврдејќи дека главна цел и' е да го внесе албанскиоит јазик на меѓународната сцена (што не е во согласност со Охридскиот договор), да биде некаков регионален играч, т.е. да ги седне Србија и Косово на иста маса (во смисла едниот да не напушта состанок кога е поканет и другиот) и да вработи што повеќе партиски кадри. Држат ли овие обвинувања или не треба, да кажат, сепак, повиканите од Владата.

Како и да е, видливо е дека речиси на сите средби на кои, и да се зборува англиски, Арифи зборува албански, до скоро без преведувач. На работниот комитет за евроинтеграција, еден од преставниците на ДУИ инсистирал сите закони што го поминуваат филтерот на СЕП да бидат преведени на англиски, а бидејќи станува збор за превод и приспособување на целото европско законодавство, процените се дека треба да се вработат педесетина преведувачи од албански. Неофицијално и на седница на Владата некој од министрите се обратил на албански јазик, а бидејќи нема превод на нив, настанал инцидент. За сите овие случувања официјално се молчеше досега, па прашање е што беше пресудно деновиве тие да се појават во јавноста, освен можеби задоцнет рефлекс на пописот или актуелен - на случувањата во Косово.