Панета: Нестрпливо ве чекаме во НАТО

Бесими на средба со американскиот државен секретар за одбрана

„Со големо нетрпение ве очекуваме во НАТО��, му порачал американскиот секретар за одбрана, Леон Панета, на својот министерот за одбрана, Фатмир Бесими, кој престојува во САД. Процесот на евроатлантското интегрирање на Македонија бил една од клучните за кои разговарале првите луѓе на одбраната на двете земји. Бесими, според извори од Вашингтон, побарал од Панета Македонија да добие во Чикаго покана за членство во Алијансата, а проблемот со името да биде решен во периодот додека се формализира приемот.

„Тие експлицитно ги поддржуваат нашите напори за членство во НАТО. Го поздравуваат нашиот придонес во меѓународните мисии. Во однос на прашањето за името, охрабруваат да се најде заемно прифатливо решение меѓу Македонија и Грција. Наше е да се каже дека Македонија е отворена за разговори и дека е заинтересирана за НАТО. Македонија во однос на глобалниот мир и безбедност нема алтернатива. Нашиот пристап во решавањето на прашањето за името е - партнери во решение наспроти ривали во проблем“, изјави Бесими во интервју за Гласот на Америка. Според него, за да успее барањето за ваков прием, сепак, потребна е согласност и од Грција.

Во соопштението од неговиот кабинет, таквото барање за фазен прием на Македонија во Чикаго не беше споменато. Место тоа, стои дека Бесими и Панета се заложиле за политиката на „отворени врати“ на НАТО, со можност за членство на сите европски демократии кои ќе ги исполнат неопходните квалификации. Бесими, исто така, искажал подготвеност Македонија да придонесува во тековните и идните мисии на НАТО како членка на Алијансата.

Бесими допатува во Пентагон по два дена поминати во Вермонт, каде што ја поздрави соработката меѓу Армијата на Република Македонија и Националната гарда Вермонт, која тече веќе речиси две децении. (Н.Р.)