Има ли нон пејпер за одлуката од Букурешт?

Атина е на штрек пред самитот во Чикаго во мај, предупредуваат медиумите во Грција деновиве, тврдејќи дека во НАТО веќе циркулира нонпејпер, наводно, од словенечките претс��авници, со кој се бара промена на одлуката од Букурешт според која приемот на Македонија во Алијансата е директно поврзан со решавање на спорот за името. Повикувајќи се на дипломатски извори, весникот „Исотимија“ пишува дека активности за промена на одлуката од Букурешт има и од британска и од турска страна со цел да се промовираат македонските интереси. Весникот пренесува и информација дека САД планираат да организираат вечера на лидерите на државите-партнери на НАТО во рамки на мајскиот самит, а Анкара побарала на неа да присуствуваат и државите-кандидати како што се Македонија, БиХ и Грузија. Се забележува дека барањето на Турција не било прифатено, меѓутоа било договорено ваквата вечера да се одржи на ниво на шефови на дипломатијата. „Сето ова му е познато на грчкото МНР, кое со мала вознемиреност ги следи овие настани“, пишува весникот, потенцирајќи дека главна тема биле напорите да се осигура дека и во Чикаго ќе важи одлуката од Букурешт.

Затоа првиот предизвик, според грчкиот весник, за новиот грчки премиер ќе биде дипломатската криза во однос на отвореното прашање за името со Македонија. „Нова влада, која ќе има свеж, но силен мандат пред себе, ќе има силна опозиција која се противи на мерките за штедење и сето тоа во ситуација на силна економска и социјална криза. Во вакви услови и барања на тројката за нови мерки, кој би си помислил дека на површина ќе дојде едно прашање како што е спорот за името“, пишува весникот, коментирајќи дека Атина ја смирува тоа што, сепак, проширувањето воопшто не е на агендата на самитот. (М.П.)