Незадоволството на граѓаните се одрази на рејтинзите

Во анкетата на „Рејтинг“ се забележува топење на разликата меѓу владејачката ВМРО-ДПМНЕ и опозицискиот СДСМ

Даниела Трпчевска



Безбедносните предизвици и лошата економска состојба во земјата влијаат на перцепцијата на граѓаните дека државата оди во погрешна насока и дека работите не се движат во саканиот правец. Тие се незадоволни од ситуацијата во земјата, но засега не гледаат политичка алтернатива. Оваа ситуација и не е така нова и оттаму влече корен големиот процент на неопределени граѓани. Ова е генералниот став на аналитичарите, по последната анкета што за „Дневник“ ја спроведе агенцијата „Рејтинг“, во периодот од 2 до 8 мај, на репрезентативен примерок од 1.560 граѓани.

За разлика од јануарската анкета на „Рејтинг“, најновите анализи покажуваат пад за дури 11 проценти на граѓаните кои сметаат дека Македонија се движи во правилна насока. Ако во јануари 52 отсто од испитаниците сметале дека државата оди во погрешен правец, сега така одговориле дури 67,6 отсто од граѓаните во телефонската анкета. Значително е повисок бројот на Албанците, 86 проценти, кои сметаат дека земјата оди во погрешна насока, за разлика од Македонците (60 отсто го делат тоа мислење). 

„Безбедносните прашања и лошата економска состојба придонесуваат граѓаните во голем процент да оценат дека работите се движат во погрешна насока. Очигледно е дека економските мерки на Владата не се чувствуваат и граѓаните во голем процент не ја одобруваат политиката на Владата во поглед на економијата која е проблем за најголем дел од анкетираните“, објаснува Никола Спасов од агенцијата „Рејтинг“.

Владимир Божиновски од Институтот за политички истражувања – Скопје вели дека е вистинска дилема како е можно, според резултатите од анкетата, државата да оди во п��грешна насока, а власта и понатаму да има голема поддршка од народот. „Не може државата да оди во погрешна насока, а од друга страна опозицијата да не добие поголема поддршка од народот“, коментира Божиновски.

Но, според агенцијата „Рејтинг“, која го спроведе последното анкетирање, „проблемот е во тоа што граѓаните се незадоволни од ситуацијата во земјата, но засега не гледаат политичка алтернатива“.

„Оваа ситуација и не е така нова и оттаму и големиот број неопределени граѓани“, додава Спасов.

Според последните резултати на „Рејтинг“ се забележува топење на разликата меѓу владејачката ВМРО-ДПМНЕ и опозицискиот СДСМ. Паѓа популарноста на владејачката партија од 23,5 на 22,1 отсто, споредено со јануарските испитувања на јавното мислење. Благ пораст се забележува кај најголемата опозициска партија СДСМ, која од 18,2 отсто во јануари, за четири месеци го подобрила рејтингот на 18,6 проценти кај граѓаните. Разликата во рејтингот меѓу двете најголеми партии сега е 3,5 проценти.

Пораст на рејтингот има кај ЛДП, која сега има 1,2 отсто, за разлика од 0,7 проценти колку што доби во јануарск��те анкети. Во албанскиот политички блок ДУИ го одржува рејтингот. Најголем пораст има кај партијата на Мендух Тачи, ДПА, чиј рејтинг во однос на јануари пораснал за 1,3 процент и сега изнесува 4,4 отсто. Паѓа рејтингот на НДП на Руфи Османи од 2,9 на 2,1 отсто. Во споредба со јануарската анкета, се намалува бројот на неопределените гласачи, но тој се' уште е голем – од 40,1 на 39,8 проценти.

Владимир Божиновски не сака да го коментира рејтингот на партиите објавен во последната анкета. „Но, според мене, нема никакви придвижувања во однос на рејтинзите, ако се направи споредба со претходните разултати од анкетата пред неколку месеци. Сите придвижувања се во рамките на маргиналната грешка“, вели тој.

Што се однесува за несигурноста која ја чувствуваат граѓаните, од кои секој втор во анкетата се изјаснил дека е небезбеден, Божиновски вели дека ваквите резултатите се сосема очекувани по петкратното убиство кај Смилковско Езеро. Но, вели дека со тоа што полицијата приведе осомничени лица поврзани со убиството се покажа дека државата има капацитет да се справи со ситуацијата. „Очекувам да се стабилилизира состојбата, особено по протестите кои не добија на интензитет и покажаа дека има политичка зрелост во општеството“, вели Божиновски.