18.05.2012, 12:29 МАНУ: Македонија да биде примена во НАТО со референца
На тој начин НАТО ќе даде решавачки придонесе за побрзо завршување на преговорите меѓу двете страни и ќе ги спречи негативните последици
Македонската академија на науките и уметностите смета дека се исполнети сите услови, на претстојниот Самит на НАТО во Чикаго или на кој било иден собир на негови овластени претставници, на Република Македонија да и биде упатена покана за членство под референцата Поранешна Југословенска Република Македонија, со уважување како рес јудицата на пресудата на Меѓународниот суд на правдата дека Грција не може да се противи на нејзиниот прием. На тој начин НАТО ќе даде решавачки придонесе за побрзо завршување на преговорите меѓу двете страни и ќе ги спречи негативните последици во сите подрачја на општествениот живот.
Се потсетува дека предмет на Привремената спогодба меѓу Република Македонија и Република Грција од 1995 година и Резолуцијата на Советот за безбедност на ООН 817(1993), е исклучиво името на државата Република Македонија што ќе се употребува во ООН.
Според МАНУ, спротивно на основните начела на правото и правдата е проширувањето на тој предмет врз прашањата за етно-културниот идентитет на македонскиот народ, името на македонскиот јазик, уставното име на државата, името под кое Република Македонија е призната во билатералните договори со други држави или воопшто употребата на името Република Македонија и атрибутот македонски надвор од ООН.
„ Етнокултурниот идентитет на секој народ е историска и културна придобивка и колективен сублимат на природното човеково право на припадност кон определена заедница, на национално и државно-правно определување, а јазикот сврзно ткиво на националната и културната заедница и основна карактеристика и услов за нејзината посебност, опстојување и иднина. Името на секоја држава, како и правото на именување на поединецот и народот, е меѓународно признато основно човеково право, велат од МАНУ.
Од Академијата потсетуваат дека со пресудата на Меѓународниот суд на правдата од 5 декември 2011 година е утврдено дека Република Грција ја повредила својата обврска да не го спречува пристапот на Република Македонија во меѓународните организации под нејзината референца.
На крајот се додава,дека пресудата фрла нова светлина врз одлуката од Самитот на НАТО во Букурешт (2008) и врз условниот прием на Република Македонија што треба да следи по решавањето на спорот за името. Пресудата констатира дека преговорите помеѓу двете страни успешно се одвиваат во добра вера за нивно продолжување и завршување, дека Република Грција веќе прифатила привременото име да го содржи зборот Македонија и дека Република Грција не ставала приговори при приемот на Република Македонија со референцата во други меѓународни организации, се истакнува во соопштението. (П.Р)
|
