„Бесплатната“ здравствена картичка ќе чини 250 денари

За невработените, за пензионери со примања до 15.000 денари, како и за самохрани родители и деца без родители картичката ќе има повластена цена од 100 денари

Јасмина Јовановска

Здравствената електронска картичка која за почеток треба да ги замени сините картони, а подоцна и здраствените книшки, место да се издава без пари, како што првично беше најавено, ќе чини 250 денари. Ова е предлог-цена што ја дефинирало Министерството за здравство со правилникот за цена на здравствена картичка и кои категории ќе бидат ослободени од плаќање. Цената беше обелодената откако Фондот за здравствено осигурување се изјасни дека околу 700.000 здравствени картички наменети за јавната администрација и за пензионерите се заглавени, бидејќи се чека на Министерството да ја дефинира цената на здравствената картичка.

Согласно со правилникот кој во Министерството велат дека е готов и е даден во Секретарјатот за законодавство на проверка, здравствената картичка ќе биде бесплатна за социјалните случаи и за лицата корисници на парична помош. За невработените, за пензионери со примања до 15.000 денари, како и за самохрани родители и деца без родители, се планира картичка со повластена цена од 100 денари, додека за сите други лица и вработени таа ќе чини 250 денари. Исто толку ќе се наплаќа и ако картичката се загуби или оштети.

Од Министерството за здравство не кажуваат зошто здравствената картичка мора да се плаќа кога беше предвидено да е бесплатна. Посебно што за нив беа планирани околу 7,5 милиони евра.

Не можејќи повеќе да чекаат да се воведе електронската здравствена картичка и за да се премости периодот до електронското здравство, од ФЗО вчера промовира сини интернет-картони. Поконкретно, се воведува интерент-сервис http://moeosiguruvanje.fzo.org.mk преку кој секој осигуреник ќе може да провери дали има здравствено осигурување и до кога му важи. Ќе може да се провери дали лицето има матичен лекар, матичен гинеколог и матичен стоматолог. Оваа интернет-страница не само што ќе им ја олесни работата на матичните лекари туку и на пацинетите доколку сакаат да го сменат матичниот лекар. Ќе се спречат и злоупотребите што ги прават матичните лекари со бројот на пациентите.

„Со интернет-сервисот ќе нема рашетување на пацинетите и на матичните лекари, туку со едно кликање ќе се проверува дали пацинетот има осигурување и кој му е матичен лекар“, појасни директорката на Фондот за здравствено осигурување, Маја Парнарџиева-Змејкова.

Директорот на Секторот за информатика во Фондот, Гоце Гаврилов, рече дека по отворањето на веб-сервисот, ��е внесуваат податоци за здравствениот број или бројот на здравствената легитимација, се користи матичниот број како лозинка и буквите од ознаката.

За првиот фондовец овој интрнет-сервис е чекор повеќе кон електронското здравство, но за да профункционира, треба да се испечатат здравствните картички и Министерството за здравство да потврди дека сите јавни и приватни здравствени установи се комплетно информатички подготвени за користење на електронската картичка.

„Подготвени сме уште утре да ја воведеме здравствена картичка, доколку се потпишат два договора со Министерството и се донесе правилник за цената на здравствената картичка“, се изјасни Парнарџиева-Змејкова кога може да се очекува сините картони да бидат заменети со здравствени картички. Едниот договор е со хрватската фирма за печатење на картичките, а другиот е за протокот на информации и податоци.

Од Министерството за здравство не одговорија ништо околу тоа кога ќе се потпишат договорите, туку само дека се чека виза за цената на здравствената каричка од законодавство. Не ни открија ни до каде е интегрираниот информатички систем за да може да се поврзат сите болници, клиники и ординации со Министерството и со Фондот за да проработи здравствената картичка барем како замена на сините картони. Од кабинетот на министерот Никола Тодоров само ни рекоа дека поради неизвршените обврски е раскинат договорот со хрватската фирма. Како пенали и' е одземена банкараската гаранција од 228.000 евра, која ќе се употреби за доработка на софтверот. „Еден дел од системот е готов, а другот дел ќе може да се среди со доработка на веб-страницата мој термин и така да се заокружи системот“, појаснија од Министерството за здравство, од каде што не објавија кога може да се завршат сите овие активности.