17.05.2012, 12:31 Сега Строс-Кан бара милион долари од собарката
Поднесе кривична пријава за клевета против Нафисатоу Дијало со барање за отштета
ЊУЈОРК – Доминик Строс-Кан поднесе тужба против собарката која го обвини дека сексуално ја нападнал, наведувајќи дека сериозно го повредила неговиот углед со, како што тој ги нарекува, лажните тврдења. Поранешниот прв човек на Меѓународниот монетарен фонд и кандидат за претседател на Франција во понедленикот возврати на парницата на собарката Нафисатоу Дијало против него со негирање и кривична пријава за клевета со барање за отштета од еден милион долари, точно една година откако таа и кажа на полицијата дека тој се обидел да ја силува во неговата хотелска соба во Менхетн. Тој вели дека се' што се случило било со обострана согласност.
Тој беше уапсен, се повлече од ММФ, помина неколку денови во затвор и три месеци во домашен притвор пред обвинителството да се откаже од гонење, наведувајќи дека ја загубило довербата во чесноста на Дијало бидејќи лажела за нејзиното минато и го промени својот исказ за тоа што направила веднаш откако ја напуштила собата на Строс-Кан.
Иако обвинителството не кажа дека веруваат оти таа ги превртела фактите, одбраната на Строс-Кан ги собори нејзините тврдења како намерни лаги. „Како директен резултат на нејзините злонамерни и неморални лажни обвиненија, Строс-Кан претрпе... значителна штета по неговаиот професионален и личен углед во САД и низ светот“, се наведува во поднесокот до судот напишан од адвокатите Вилијам Тејлор, Хју Кемпбел и други. За него прво информираше „Њујорк пост“.
Еден од адвокатите на Строс-Кан изјави дека контратужбата не треба да биде никакво изненадување за Дијало. „Таа е директно одговорна за неговото апсење, затворање и подложување на неверојатна болка, страдање и трошоци“, наведува во соопштението Вилијам Тејлор Трети. „Нејзиното однесување не е без последици за неа и од него не се бара да го издржи она што таа го направи и нејзините напори да профитира без да го возрврати ударот“.
Дијало (33), рече дека кога пристигнала да го исчисти апартманот на Строс-Кан, тој наеднаш почнал да ја брка, обидувајќи се да и ги соблече хулахопките и да ја присили на орален секс. Таа наведе дека меѓу другите повреди, и бил искинат лигаментот на рамото. Асошиетед прес обично не ги именува луѓето кои пријавуваат дека биле сексуално нападнати освен ако тие не излезат сами пред јавноста, како што тоа беше случај со Дијало.
Женетиот Строс-Кан (63), призна дека имал сексуален однос и тоа го оцени како „морален неуспех“, но инсистираше на тоа дека не бил со присила. Во неговата тужба се наведува дека тој и Дијало „имале сексуален однос со обострана согласност“ и додаде дека таа „на никаков начин не била повредена“.
Во тоа време Строс-Кан се сметаше за водечки кандидат на социјалистите кој ќе го порази конзервативниот француски претседател Никола Саркози. Социјалистот Франсоа Оланд минатата недела победи на претседателските избори. (АП)
|
