17.05.2012, 12:44 Младиќ вмешал прсти во сите злосторства во Босна
Хашкото обвинителство денеска во продолжението на уводните зборови на судењето на Ратко Младиќ ја истакна одговорноста на воениот командант на Војската на Република Српска (РС) за Сребреница, нагласувајќи дека „само војска која строго се контролира од самиот врв би можела успешно да изврши убиство на 7.000 луѓе за само четири дена“.
Обвинителството најавува дека ќе докаже дека Младиќ командувал со силите и бил „лично на теренот и лично вмешан“ во злосторствата во Сребреница.
- Силите на Младиќ во јули 1995 година ги протерале цивилите од Сребреница и убиле околу 7.000 мажи и момчиња. Жените, децата и повозрасните лица едвај преживувале во бегалските кампови, Тоа беше и останува геноцид, изјави обвинителот Питер Меклоски.
Според него, по 17 години истрага доказите за ова злосторство се толку бројни што се неоспорни - од 11 до 14 јули се убиени околу 7.000 луѓе, додека 5.977 се ексхумирани од масовните гробници поврзани со Сребреница.
Обвинителот најави изведување на „многубројни сведоци од редовите на Војската на РС и МВР“, кои ќе сведочат за злосторствата во кои и самите учествувале.
- Но морам да ве предупредам дека повеќето од овие сведоци нема да ви ја кажат целата вистина. Поради тоа ќе бараме да им се испрати официјално предупредување, истакна Меклоски.
Тој нагласи дека наредбите кои „во најголема мерка се злосторнички, во оваа воја биле давани усмено, а голем број релевантни документи се уништени или скриени“.
- Сепак Обвинителството има искази од војници кои ги извршиле убиствата, офицери кои ги надгледувале егзекуциите, документи, разговори, видео снимки на две убиства, додаде Меклоски.
|
