16.05.2012, 13:46 Грција доби чиновничка влада
Нов премиер е претседателот на Советот на државата, Панајотис Пикраменос
Од нашиот дописник
Миркица Поповиќ
Атина - Грција ќе има нова чиновничка, влада која ќе ја раководи државата до распишување на следните избори. Нов премиер е претседателот на Советот на државата, Панајотис Пикраменос. Пикраменос денеска се сретна со грчкиот претседател Каролос Папуљас за да се договорат новите членови на оваа преодна влада, чиј рок на траење завршува најверојатно на 17 јуни кога се очекува да бидат новите парламентарни избори.
Пикраменос, чие име во превод значи горчлив, нешто што грчките граѓани го гледаат и како соодветна симболика на нивната сегашна ситуација, е правник по професија. Роден е во 1945 година, има завршено Правен факултет на Атинскиот универзитет, а постдипломските студии по јавно право ги завршил на Универзитетот во Париз. Пикраменос од 1992 до 1993 бил дел од правниот кабинет на грчкиот премиер, а во периодот од 2005 до 2010 година бил директор на националната академија за судии. Од 2010 е избран за претседател на Советот на државата, каде што ќе остане на функција до 2014 кога се очекува да се пензионира.
Одлуката за Пикраменос падна по едночасовни расправии меѓу политичките лидери во кабинетот на претседателот Папуљас. Свои предлози за нов премиер и членовите на новата влада пред Папуљас ги изложија Адонис Самарас, лидерот на Нова демократија, Евагелос Венизелос на ПАСОК, Алексис Ципрас лидерот на СИРИЗА, Фотис Кувелис од Демократска левица, лидерката на комунистичката партија Алека Папарига, како и лидерот на десничарската Независни Грци, Панос Каменос. Лидерите дури ни на оваа средба не можеле да се согласат во мирна клима околу името на новиот премиер, по што Папуљас го предложил Пикраменос, кој според грчкиот устав заедно со главниот судија на Врховниот суд беше еден од лицата кои е можно да бидат поставени на челото на чиновничка влада. Она што е интересно е дека на оваа средба се споменувало и името на Лукас Пападимос во предлог досегашниот премиер да остане на чело на владата до новите избори. Со предлогот Пападимос да остане премиер се согласиле Самарас и Венизелос, а во одреден момент и Ципрас, кој потоа бил критикуван дека се' до вчера говорел против Пападимос и барал негова итна промена. Грчките медиуми минатата недела шпекулираа дека можно ќе беше Пападимос да одбие да продолжи неговата функција поради начинот на кој се развиваа разговорите меѓу грчките политички лидери и Папуљас и штетата која ова ја има направено за Грција во очите на меѓународната јавност.
Лидерите и Папуљас разговарале и за улогата која ќе ја има оваа влада, односно дали ќе смее да носи големи државни ��длуки. Од комунистичката партија посочиле дека владата не треба да има толку одврзани раце, односно да има само техничка улога и доколку дојде до потреба да се донесат големи важни одлуки, тогаш тоа да се одлучи повторно во консултација со претседателот и сите партии. Одлуката каква ќе биде владата се очекуваше да се знае по нејзиното целосно формирање. До затворање на весникот не беа познати новите членови на владата, за кои сам ќе одлучува Пикраменос.
Новиот премиер и новата грчка влада треба да дадат заклетва најдоцна до 10 часот денес, за кога се очекува и прв пат да се собере новото грчко Собрание. Според правилата на грчкиот Устав, избраните пратеници на изборите денес мора да поднесат заклетва, а потоа ќе бидат распуштени и ќе бидат и официјално распишани избори. Грчките медиуми пренесуваат дека на новите 300 пратеници нема да им биде исплатен пратеничкиот надоместок за државата да не се оптоварува со дополнителни трошоци.
|
