18.05.2012, 12:04 Човекот кој го создал Интернетот не користи Фејсбук
Лен Клајнрок (77) еден од творците на Интернетот и најверојатно првиот човек кој го користел, денеска одбива да користи Фејсбук и тврди дека не му е потребен. „Одличен е за моите внуци, но не е за мене“, рече професорот од Универзитетот во Калифорнија.
Клајнрок признава дека неговиот одговор генерациски е условен и најверојатно такво нешто би рекол и вашиот дедо, но во овој случја причината не е непознавање на најсовремената технологија, карактеристично за поголем број стари луѓе.
Клајнрок беше член од тимот кој го измисли Интернетот и тоа во далечната 1969 година кога истражувачите собрани во лабораторијата во Универзитетот во Калифорнија меѓусебно ги разгледувале пробните податоци меѓу двата тогашни гломазни компјутери.
Беше тоа зачетокот на мрежата Арпанет која со време се трансформираше во Интернет кој денес го познаваме.
- Поточно, имам чувство на веќе видено и доживеано. Немам повеќе потреба да ширам контакти и да изнаоѓам социјални групи со кои би се поврзал. Тешко ми е да држам контак и со луѓето со кои веќе сум поврзан. Електронската пошта ми е преполна со пораки, моите пријатели и колеги секогаш можат да ме најдат и навистина не сакам уште една мрежа која редовно би морал да ја проверувам, рече Клајнрок.
Во ваквиот став Клајнрок воопшто не е осамен. Повеќе од 900 милиони луѓе најмалку еднаш месечно одат на свој налог на Фејсбук, но милиони други категорички одбиваат да отворат свој налог на оваа социјална мрежа.
Две петини од возрасните Американци немаат свој налог на Фејсбук, а третина од тој број тврдат дека не им треба или дека не ги интересира. Со излегувањето на берзата Фејсбук најверојатно ќе го зголеми притисокот на оваа категорија во настојување да ја придобие.
Најголема перспектива за понатамошно ширење на најпопуларната социјална мрежа има во земјите во развој каде голем број луѓе се уште немаат пристап на Интернет.
|
