18.05.2012, 14:18 Дона Самер жртва на токсичниот прав од нападите на 11 септември
Познатата американска музичка ѕвезда на седумдесетите и осумдесетите години на 20 век, умре вчера во 63 година од животот, од рак на белите дробови
„Кралицата“ на диско музиката, Дона Самер е, најверојатно, жртва на токсичниот прав, што се создаде во Њујорк, по терористичкиот напад од 11 септември 2001 година и соборувањето на облакодерите „близначки“ од Светскиот трговски центар, пишува лондонски „Сан“.
Оваа позната американска музичка ѕвезда на седумдесетите и осумдесетите години на 20 век, умре вчера во 63 година од животот, од рак на белите дробови.
Во време на нападите од пред безмалку 11 години, Дона Самер била во Њујорк, во нејзиниот стан што се наоѓа сосема блиску до местото каде се урнаа двата облакодера и каде имаше најголема концентрација на прав во воздухот и густ пепел по улиците, тротоарите и околните згради.
Таа самата им зборувала на своите најблиски и на пријателите, дека ракот од кој е заболена е директна последица од вдишувањето на отровните состојци во правот, што се ослободи, откако исламските терористи го соборија њујоршкиот трговски центар.
Во овој напад имаше дури три илјади жртви, но и сега, по речиси 11 години, се уште умираат луѓе, како директна последица на она што се случи на 11 септември 2001 година и големото загадување што го предизвика уривањето на облакодерите. Дури илјада луѓе се умрени во изминатите години, од правот што го имаат вдишено, а за 350 од нив е утврдено дека умреле од рак на белите дробови, или на органите за дишење.
Лондонскиот весник открива дека истражувањето што го имаат направено американските здравствени власти покажало оти значително е зголемен бројот на заболени од рак, меѓу полицајците и пожарникарите кои беа на местото од терористичкиот напад во Њујорк.
|
