На 23 јуни гласање за недоверба на Хаџи-Ристески



Иницијаторите закажаа вонредно Собрание на ФФМ, местото и терминот ќе бидат дополнително познати, велат дека УЕФА И ФИФА се запознати со секој нивни чекор

Вонредно Собрание на Фудбалска федерација на Македонија (ФФМ) ќе има ова лето. Го најавуваат и свикуваат претставници на иницијативниот одбор за промени во македонскиот фудбал зад кое, според нив, стојат 16 општински фудбалски сојузи (Скопје, Кисела Вода, Куманово, Струмица, Штип, Велес, Кочани, Демир Хисар, Свети Николе, Пробиштип, Валандово, Кавадарци, Кичево, Битола, Тетово, Охрид). Гласањето што треба да резултира со искажување недоверба кон претседателот Харалампие Хаџи-Ристески ќе се одржи на 23 јуни, а за местото и терминот иницијаторите дополнително ќе ја известат јавноста.

„Со потпишување на барањето од десет општински фудбалски сојузи и писмена поддршка од уште шест, ние како иницијативен одбор закажуваме вонредно Собрание на 23 јуни. Местото на одржување ќе го објавиме дополнително. За секој наш чекор се консултираме со експерти, за секој наш чекор ги известуваме УЕФА и ФИФА. Нема да отстапиме така лесно и покрај заканите и заплашувањата", изјави Стојанче Златановски од ОФС Куманово на денешната прес-конференција во Скопје.

За понатаму е планирано да се инсталира работна група чија задача ќе биде подготовка и организација на вонредно изборно Собрание. Истото, според Статутот, ќе следи по 45 дена, а материјалите за дневниот ред ќе им бидат доставени на делегатите на 10 дена пред неговото одржување. (С.Д.)